Erdogan desaloixa por a fuerza a plaza Taksim

O Primer Ministro turco, Erdogan, preba de meter fin a las protestas contra o suyo gubierno

A policía antidisturbios ha irrumpiu a primer hora de hue en a plaza Taksim, en Istambul, lanzando gases glarimochenos contra os manifestants presents en o puesto y ferindo a lo menos a dos personas, en un intento ta meter fin a las protestas que mientres dos semanas han sobatiu o país. “O nuestro obchectivo ye eliminar as pancartas y fotos en a estatua d’Atatürk y o Centro Cultural Atatürk. No tenemos atro obchectivo”, escribió o gubernador d’Istambul, Huseyin Avni Mutlu, en o ret de micromensachería Twitter en relación a ista acción policial.

“O Parque Gezi y (a Plaza) Taksim no serán tocaus”, ha adhibiu. Centenars de manifestants con mascarutas antigas y cascos de plastico se reunioron en as escaleras que conducen dende a plaza ent’o parque, mientres que a policía situó vehíclos equipaus con canyons d’augua y blindaus arredol d’a plaza.

As imachens en directo d’as televisions amuestran o lanzamiento d’uns pocos coctels molotov contra os achents antidisturbios. Sobre isto, os manifestants trasladaus t’o Parque Gezi decamín han meso distancia entre ells y os elementos mas violentos y han asegurau por Twitter que nunca no heban visto a las personas que han aventau os coctels molotov en as dos semanas transcurridas dende o prencipio d’as movilizacions.

Ista mesma nueit, a policía ha atacau qualques campamentos levantaus por os ‘indignaus’ en quantas ciudatz turcas en solidaridat con l’acampada d’a plaza Taksim d’Istambul, epicentro d’as protestas. En Ankara, os policías han emplegau canyons d’augua y gases glarimochenos ta dispersar a os manifestants reunius en a plaza Kizilay, y seguntes informa o diario Hürriyet, os achents forzoron o desaloixo d’a plaza. Tamién en a capital turca, concretament en o parque Kugulu, os achents han desmantelau as tiendas de campanya que heban levantau os ‘indignaus’. En un primer momento, os manifestants resistioron as cargas policials, pero finalment os achents consiguioron tomar o parque y desmantelar as tiendas.

En a ciudat d’Adana, en o sud d’o país, os policías han atacau a una colla de manifestants en o vico d’Akkapi quan prebaban de sumar a atros ‘indignaus’ que yeran estando increpaus y asediaus por simpatizants d’o gubernant Partiu Chusticia y Desembolique (AKP). Os achents han dispersau a os manifestants con canyons d’augua y gases glarimochenos.

Futuro y present d’a protesta

A Plataforma de Solidaridat de Taksim ha emitiu una nueva declaración en que retira a demanda d’a dimisión de totz os responsables d’a represión policial, pero mantiene a suya reivindicación de que s’anulen os plans de remodelación d’o parque Gezi d’a plaza Taksim y que “no se toque ni uno solo d’os arbols”. D’a mesma traza, os ‘indignaus’ acampaus en a plaza demandan que se faiga una investigación sobre a violencia exercida por as fuerzas policials contra os manifestants.

O primer ministro de Turquía se reunirá o venient miercols con representants d’a plataforma que organizó as primeras protestas, seguntes informó ahiere o numero dos d’o Gubierno, Bulent Arinc. L’obchectivo d’a trobada -refusada dica agora por Erdogan, que ha calificau a os manifestants como “saquiadors” u “chentota”- ye meter fin a las protestas, que empecipioron por o refuse a la destrucción d’un parque d’Istambul y han derivau en masivas manifestacions antigubernamentals, en un país en que o primer ministro cuenta tamién con un numero important de partidarios.

Dica hue, a oleada de protestas de ciudadanos turcos ha deixau 5.000 ferius y dos manifestants muertos, amás de numerosos detenius -mas de quaranta por fer servir os retz socials-, pero tamién ha descubierto os presuntos suicidios de siet policías en as zagueras dos semanas. Hue, o departamento de prensa d’a Policía turca reconoixe o suicidio de quatro achents, alegando motivos personals -debant d’as declaracions d’o secretario cheneral d’o sindicato policial Emniyet-Sen, Faruk Sezer, que informó d’a muerte de seis achents- amás d’atro achent antidisturbios, dimpués d’as chornadas de protesta en que a policía fació servir gases glarimochenos y canyons d’augua ta dispersar a os manifestants, o que provocó que as manifestacions derivasen en enfrontinamientos y, posteriorment, s’estendillasen ta atras ciudatz.

Fuent: http://noticies.sirius.cat/2013/06/video-erdogan-desallotja-per-la-forca.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.