Escandalo en os Estaus Unius por as torturas y as mentiras d’a CIA

Un informe exhaustivo d'o senau demuestra que a CIA mintió a o parlamento, que practicó torturas durisimas y que no sirvioron de res

Centro de detención de Guantánamo. Foto: Shane T. McCoy

Centro de detención de Guantánamo. Foto: Shane T. McCoy

En os Estaus Unius aguardaban l’informe que o senau heba iu elaborando dende fa cinco anyos sobre as actividatz d’a CIA dimpués de l’11 de setiembre. Ahiere estió publicau y provocó un autentico escandalo que podría tener conseqüencias de toda mena. O documento contrimuestra que l’achencia torturó mas que no heba reconoixiu y con muita mas dureza que no heba reconoixiu nunca. Y tamién contrimuestra que mintió de contino en o parlamento americano. Con tot y con ixo, a conclusión mas important de todas ye que a tortura no sirvió de brenca en garra caso.

A CIA heba afirmau de quan en quan que a tortura heba estau util pa trobar as pistas que heban conduciu finalment a Bin Laden. Pero l’informe lo desmiente de raso.

As prencipals conclusions d’o estudeo (que se pueden leyer en anglés aquí) son:

– Que a CIA torturó de traza mas brutal que nunca no s’heba explicau y a a-saber-la mas chent que no heba dito,

– que no i habió garra investigación correcta d’as actividatz d’a CIA, relacionadas con a tortura de detenius,

– que exacheró y enganyó a o congreso y o president sobre pistas obtenidas baixo tortura, pa poder continar torturando,

– que os dirichents d’a CIA estioron siempre duros y tallants contra beluns d’os suyos subordinaus que qüestionaban a eficacia d’a información obtenida por medio d’as torturas,

– que s’amagó y rebaixó o numero de detenius y o numero de torturaus,

– que a lo menos 26 personas no fuoron nunca detenidas ni suchetas a torturas y anyos de prisión,

– que a CIA manipoló a periodistas pasando-les información falsa que meteba de relieve a presunta eficacia d’as torturas.

O texto tien mas de seis mil pachinas y ye fruito d’una investigación sin precedents por parte d’o parlamento americano. D’as seis mil pachinas, solament s’ha feito publico o resumen, que ocupa unas cincocientas. Muitas d’as acusacions que agora s’ha feito oficialment sobre as actividatz d’a CIA ya s’heban feito publicas por medio d’informacions periodisticas u d’ONG, pero agora l’impacto politico puede estar muit important.

Fuent: http://www.vilaweb.cat/noticia/4223243/20141210/escandol-estats-units-tortures-mentides-cia.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.