Escomencipa a vaga en o servicio d’autobús urbano de Zaragoza

Hue ha empecipiau a vaga indefinida en os autobuses urbanos de Zaragoza, dimpués de no plegar en un alcuerdo en a zaguer reunión en o SAMA

Foto: AraInfo

Foto: AraInfo

Finalment i habrá vaga indefinida en os autobuses urbanos de Zaragoza. Os atures prencipiarán hue mesmo, entre as 12.30 y as 15.30 horas, dimpués de no plegar en un alcuerdo en a reunión mantenida iste mesmo maitín entre a dirección d’AUZ y representants d’o comité d’interpresa en o Servicio Aragonés de Mediación y Arbitrache (SAMA).

En o zaguer intento por evitar a vaga, o comité d’interpresa ha acudiu a la zaguera reunión en o SAMA a on a dirección d’AUZ ha tornau a refusar a ufierta lanzada por o consistorio, y reafirmada por o 90% d’a plantilla.

Seguntes a dirección d’AUZ a proposa, que suposaría recolocar a os 125 despedius en dos anyos, ixamplando o ret d’autobuses en 500.000 kilometros dende l’1 de chinero a cambeo d’a conchelación d’o salario d’os treballadors dica 2015, mete “en serio risque a suya viabilidat”. Por tanto, o comité d’interpresa, pese a haber prebau en repetidas ocasions de plegar en un alcuerdo pa privar a vaga, ha confirmau o prencipio d’os atures que rancan hue mesmo.

Todas dos partes han sinyau as actas d’a enesima reunión mantenida baixo o siello de no ‘i hai alcuerdo’, dando prencipio a o periodo de vagas convocau por as y os treballadors y que ya han secundau os emplegaus d’o tallers de 6.00 a 8.00 horas d’iste maitín con un seguimiento d’o 100%.

A vaga, de caracter indefiniu, s’estendillará “mientres no se dé un plan adequau pa reponer en os suyos puestos de treballo a os 125 despedius y se solucione o conflicto d’o convenio colectivo”, ha reiterau Javier Anadón, president d’o comité.

Por agora, l’horario d’os atures se mantendrá en a francha de 12.30 a 15.30 horas fueras d’o día 27, quan os atures se prolargarán dende as 8.00 dica as 17.00 horas y o día d’o pregón d’as Fiestas d’o Pilar 2013, o 5 d’octubre, quan o servicio se veyerá paralizau de 20.00 a 00.00 horas.

Cal recordar que o Concello ha imposau un 50% de servicios minimos obligatorios, resolución que estió recurrida por o comité en considerar-los excesivos.

Fuent: http://arainfo.org/2013/09/comienza-la-huelga-en-el-servicio-de-autobus-urbano-tras-la-negativa-de-la-empresa-auz-para-llegar-a-un-acuerdo/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.