Esfendemos as luengas organiza una Chornada esportiva por un Aragón Trilingüe

L'acto central será un cross de 3 km con salida y plegada en o Parque Bruil

cartelO venient 28 de setiembre, Esfendemos as luengas organizará «A tot estrús», a I Chornada esportiva por un Aragón trilingüe. Mientres tot lo diya se ferán diferents actividatz que achuntan o esporte, l’actividat fisica y a salut, con a diversidat lingüistica y cultural aragonesa. A más gran parti d’as actividatz se ferán de raso en aragonés.

L’acto central será un cross de 3 km, con salida y plegada en o Parque Bruil de Zaragoza, a on que cadagún d’os participants portará un dorsal con una parola en aragonés u catalán. Antimás d’o cross, tamién se ferá un taller de chuegos tradicionals aragoneses, una gymkana trilingüe y un taller d’estiramientos ta escusar-se lesions, en una chornada que prencipiará a las 11:00. As inscripcions t’o cross, que prencipiará a las 13:30, se pueden fer en esfendemosasluengas@gmail.com.

Dimpués d’a chenta, a chornada continará con atro taller, en iste caso de bike polo, a on que bells chugadors d’iste esporte esplicarán como se chuga, a suya historia y amostrarán a chugar a los participants. A chornada rematará con una mesa redonda titulada «Hinchadas, esporte, luenga y identidat» a on que se debatirá sobre a relación entre as aficions d’os equipos esportivos y a presencia d’as luengas minoritarias en istas. Iste ye l’unico acto que no se ferá en o Parque Bruil, sino en o CSA A Enrestida (C / Sant Cristobal).

Dende Esfendemos as luengas, quieren continar con a suya faina de «esfensa d’as luengas propias d’Aragón», más que más en un tiempo «que tanto les enristen» y creyen especialment «grieu que istas enrestidas viengan dende as institucions que nos habrían de representar a totz». Convidan, antimás, a la participación y a salir t’a carrera a correr «a tot estrús por a suya normalización, dignificación y oficialidat».

Una rispuesta a Esfendemos as luengas organiza una Chornada esportiva por un Aragón Trilingüe

  1. Pingback: Esfendemos as luengas organiza una Chornada esportiva por un Aragón Trilingüe | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.