“Esfendemos as luengas” pide l’uso d’as luengas d’Aragón en o comercio

Se fa ficancia en as interpresas de distribución pa fer servir l’aragonés y catalán

En linia con a zaguera campanya empentada por “en aragonés sí por favor” (enaragonesblog.wordpress.com) “Esfendemos as luengas” ha denunciau a manca de sensibilidat d’as grans interpresas con as luengas propias que se i charran en Aragón.

Dende Esfendamos as luengas han declarau no entender “como as grans interpresas d’a distribución en o Estau espanyol como Eroski, Mercadona, El Corte Inglés, etc rotulan bilingüe, sin garra problema, en atras comunidatz con luengas propias. Manimenos en Aragón contribuyen con a suya rotulación a la manca d’entendimiento, a diglosia y a la vulgarización d’os terminos tradicionals emplegaus en as botigas”.

O colectivo ha reclamau “una ripa de lexico de fruita, virolla, vechetals,.. que son emplegaus en tot Aragón y que istas grans interpresas d’a distribución imponen, modifican y castellanizan. Femos ficancia en especial, en centros localizaus en zona vivas aragonesoparlants como lo Campo de Chaca u Samianigo, do habrían de tener una especial sensibilidat. Y o mesmo en Fraga con o catalán”.

Esfendamos as luengas ha feito ficancia en que “supermecaus como Eroski u Mercadona habrían de seguir o mesmo camín preniu en atras comunidatz y rotular en aragonés y catalán. A carencia d’ista rotulación no ye debida a que sigan luengas con un baixo potencial en numero de parladors, ni que no gozen de políticas favorables. En o caso de Mercadona, centros tan amanaus como lo de Vielha en Valh d’Arán yValencia, son rotulaus en aranés y catalán valenciano. Atras gran interpresas d’a distribución, en iste caso de muebles (IKEA) u de virolla rapeda (McDonalds), tampoco no precisan de garra status d’oficialidat pa la suya rotulación en euskara en o centro de IKEA (Bayona) u McDonalds pa la suya publicidat en asturiano.”

Ye por ixo que dende Esfendamos as luengas animan “a seguir con a campanya de “en aragonés Sí por favor” y meter un pegallo en os cartels d’istas grans interpresas d’a distribución, pa avisar que aquí no clamamos a la fruita, a virolla u l’abadeixo d’ixas trazas. Porque aquí charramos aragonés y catalán”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.