Espanya demanda a Europa os diners ta rescatar os suyos bancos

Europa ubrirá una linia de credito de dica 100.000 millons d'euros ta rescatar a banca espanyola, encara que o gubierno espanyol no fabla de rescate

O ministro espanyol d’Economía, Luis de Guindos, ha anunciau hue que Espanya demandará aduya financiera a Europa ta “recapitalizar os bancos espanyols que asinas lo amenisten”. De Guindos no ha quiesto fablar de “rescate”, y tampoco no ha esplanicau as condicions que podria demandar o fondo d’aduya europeyo, encara que si ha dito que “ixas condicions nomás que afectarán ta o sector bancario”.

A quantidat que se ye manullando ye de 100.000 millons d’euros, buena parti d’ells podrian ir adedicaus ta Bankia, que dica fa bellas semanas menaba Rodrigo Rato. Encara que o gubierno espanyol heba dito entre toda ista semana que no se planteyaba garra rescate, y mesmo ahiere a vocera de l’executivo deciba que s’heba d’asperar, a la fin, as rumors que deciban que hue Espanya demandaría ixe rescate han resultau ciertas. O FMI que ha presentau ista maitinada as necesidatz d’a  banca espanyola participará d’iste rescate que o gubierno espanyol no clama rescate, pero no deixando diners que asesorando financierament.

A petición d’aduya espanyola ha plegau dimpués de tres horas de videoconferencia de l’Eurogrupo, ta pactar-ne as condicions (Comunicau en PDF). Encara que a quantidat que amenistan os bancos espanyols ye de 40.000 euros, seguntes o FMI, y que afecta nomás que a o 30% d’os bancos, seguntes o gubierno espanyol, a petición de diners ha puyau dica os 100.000 millons d’euros ta cubrir problemas que puedan amaneixer. A tamás d’iste feito, unico en a historia d’Espanya, de petición d’aduya europeya ta capitalizar a banca, o president d’o Gubierno espanyol no ha compareixiu, feito que o ministro d’Economía ha esplanicau porque o miembro de l’Eurogrupo ye ell y no lo president d’o gubierno.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.