Espanya y Chile y as suyas Leis d’Amnistía

Gallardón presume de Lei d'Amnistía mientres Chile enruena a de Pinochet

Exhumación, por parti d'a Asociación para la Recuperación de la Memoria Histórica, d'un fosal de represaliaus d'a Guerra Civil en O Bierzo (Leyón). (Foto: Wikipedia)

Exhumación, por parti d’a Asociación para la Recuperación de la Memoria Histórica, d’un fosal de represaliaus d’a Guerra Civil en O Bierzo (Leyón). (Foto: Wikipedia)

O ministro de Chusticia d’o Gubierno d’Espanya, Alberto Ruiz Gallardón, destacó o pasau martes en o Pleno d’o Senau que o Gubierno “discrepa clarament” con bels informes d’a ONU sobre os crimens d’a Guerra Civil y o franquismo. Más que más -enfatizó- con a petición d’os expiertos d’a ONU a o Gubierno espanyol ta que anule a Lei d’Amnistía de 1977, un texto que se niega a qüestionar y que mantiene blindaus a os responsables de crimens contra a humanidat que se practicoron en Espanya antes d’o 15 d’aviento de 1976.

Qui interpeló a Gallardón en o Senau estió o senador d’o grupo parlamentario vasco Jokin Bildarratz, que remeró que a ONU zifra en mas de 150.000 o numero de desapareixius en a Guerra Civil y o franquismo. “O mayor numero d’o mundo dimpués de Camboya”, recalcó Bildarratz. En a mesma linia que ell s’han posicionau en os zaguers anyos atros grupos, como os de BNG u IU, encara que mesmo que o PCE -un d’os partius que integran a coalición de IU- votó a favor d’a lei d’octubres de 1977.

Dende l’aprobación d’a Lei d’Amnistía, os succesivos gubiernos de PP y PSOE han bloquiau siempre a posibilidat d’anular-la, “cosa que ya ha feito Archentina con a suya, y que Chile plega d’anunciar que ferá”, remera José Antonio Martín Pallín, machistrau emerito d’a Sala d’o Penal d’o Tribunal Supremo.

“Chile no ha perdiu a memoria, Chile no ha ixuplidau a os suyos fillos acazaus, executaus y detenius desapareixius. Chile no ha ixuplidau a qui mantenioron viva a esperanza d’un país libre”, sostenió o pasau chueves a presidenta d’o país, Michelle Bachelet, en un acto en o Palacio d’a Moneda con motivo d’o 41º aniversario d’o Golpe d’Estau de Pinochet. En ista trobada, a socialista chilena confirmó que o suyo gubierno anulará a Lei d’Amnistía d’o dictador, que protecheba a os autors de crimens contra a humanidat cometius en o país entre 1973 y 1978.

Entre 1973 y 1990, arredol de 3.000 personas estioron asasinadas u desapareixidas y atras 28.000 sufrioron torturas, incluida a presidenta Bachelet.

 

Fuent: http://www.lamarea.com/2014/09/13/gallardon-presume-de-ley-de-amnistia-mientras-chile-entierra-la-suya/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.