Espectacular descubrimiento d’as ondas d’o primer inte de l’universo

Investigadors de Harvard captan a marca d'a teoria d'a inflación cosmica, que refuerza a teoría d'o Big Bang

Foto: NASA

Foto: NASA

Os scientificos tienen nuevas prebas d’a teoría d’o Big Bang. Os scientificos d’o Centro d’Astrofisica de Harvard (EE.UU.) han anunciau hue que heban detectau por primer vegada as ondas gravitacionals que recorrioron l’universo primitivo, entre un periodo d’ixample muit rapeda que escayeixió unas fraccions de segundo dimpués d’a gran esclatada que orichinó tot ixo que ha existiu dimpués; ye dicir, o Big Bang.

Ye a confirmación mas important d’a historia sobre as teorías d’a inflación cosmica. O descubrimiento s’ha feito en a investigación d’o prochecto BICEP 2, que fa servir un telescopio situau cerca d’o polo sud ta fer observacions detalladas d’una parte muit concreta d’o cielo y que replega ‘enerchía fosil’ d’o Big Bang.

Se considera que l’universo surtió dimpués d’o Big Bang, que se produció fa uns 13.800 millons d’anyos. Muit poco dimpués, o espacio s’empecipió a ixamplar exponencialment, en un periodo conoixiu por inflación. En o cosmos i hai signos reveladors d’iste periodo, en un resplandor que se denomina ‘fondo cosmico de microondas‘. Y ye aquí an que os investigadors han mirau mientres muito tiempo a evidencia mas directa d’aquella inflación, en forma d’ondas gravitacionals, que estreitan y estiran o espacio, y que agora han puesto detectar.

‘Son chicotas fluctuacions quanticas que estioron amplificadas enormement por l’ixample inflacionario de l’universo’, ha explicau Jamie Bock, un d’os responsables d’a investigación. O proposito –y l’obchectivo– yera trobar un marcador residual d’inflación, ye dicir, d’a ideya que o cosmos experimentó un brote de creiximiento exponencial en a primera billonesima de billonesima de billonesima de segundo.

Ista teoría sostiene que isto, iste fenomeno, fació que l’universo primitivo pasase d’estar una cosa inimachinablement chicota a unatra d’a mida aproximada d’una bala, y que o espacio ha continau creixendo mientres quasi 14.000 millons d’anyos mas, dica agora mesmo.

A teoría d’a inflación se proposó por primer vegada en o decenio de 1980 ta explicar qualques aspectos d’a teoría d’o Big Bang que pareixeba que no l’explicaban tot, como por eixemplo por qué o espacio profundo se veye en cheneral d’a mesma traza por tot arreu. L’argumento yera que un ixample muit rapedo en o escomienzo podría haber suavizau as irregularidatz.

Pero a inflación plegó con una predicción muit especifica, asociada con olas d’enerchía gravitacional, y que istas olas en o teixiu d’o espacio deixarían una marca imborrable en a luz primitiva d’o cosmos, ixo que ye conoixiu como fondo cosmico de microondas.

O equipo BICEP 2 diz que agora ha identificau iste sinyal, que ye una marca caracteristica d’as propiedatz direccionals d’o fondo cosmico de microondas. Solament as ondas gravitacionals que se mueven a traviés de l’universo en aquella leixana fase inflacionista podría haber produciu una marca como ista.

En a intervención en a conferencia de prensa ta anunciar os resultaus, o profesor John Kovac ha dito: ‘Isto represienta una puerta ubierta a ixo que creyemos que ye un nuevo rechimen d’a fisica, a fisica d’o que ocurrió en a primera increyiblement chicota fracción de segundo de l’universo.’ As declaracions de Kovak han estau replegadas por a BBC.

Fuent: http://www.vilaweb.cat/noticia/4179657/20140317/espectacular-descobriment-ones-primer-instant-lunivers.html

Una rispuesta a Espectacular descubrimiento d’as ondas d’o primer inte de l’universo

  1. Pingback: Espectacular descubrimiento d’as ondas d’o primer inte de l’universo » AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.