Espiello bate un nuevo record de documentals presentaus, con 182 titols

Ya se prencipia a parar a venient edición d'Espiello, o Festival Internacional de Documental Etnografico de Sobrarbe, que se celebrará en abril de 2014

Basilio Martín Patino, aconsiguió o maximo reconoiximiento en a pasada edición

Basilio Martín Patino, aconsiguió o maximo reconoiximiento en a pasada edición

Espiello, Festival Internacional de Documental Etnografico de Sobrarbe sigue batendo records de participación en a suya decimosegunda edición, con 182 titols recibius de 34 países. A comarca de Sobrarbe -a traviés d’o servicio de Cultura- y o Centro d’Estudios de Sobrarbe son os encargaus d’organizar o XII Festival Internacional de Documental Etnografico de Sobrarbe.

O festival, que se celebrará d’o 4 a o 12 d’abril de 2014 en o Palacio de Congresos de Boltanya veye cómo, por primer vegada, as produccions internacionals superan a las estatals. D’o 58% de cintas extrancheras, o 36% corresponden a directors iberoamericanos, con una excelent presencia de realizadors mejicanos, que han presentau 41 cintas, “gracias a la colaboración con l’Instituto Nacional de Cinematografía Mejicano (INCINE)”, explica a directora d’Espiello, Patricia Español.

Prencipia o treballo d’o churau de preselección

Dimpués d’a recepción d’as 182 cintas, agora prencipia o treballo d’o churau de preselección, encargau d’esleir os documentals que competirán en a Sección Concurso d’Espiello. O churau de preselección lo conforman os 25 miembros d’a Comisión Permanent d’o festival, amás d’os 9 churaus externos expertos en cine documental u Antropolochía Visual: Cristina Argota, especialista en comunicación audiovisual, responsable de l’aria de medios audiovisuals de l’Instituto Nacional d’Antropolochía (INALPl); José Carmelo Lisón, profesor d’Antropolochía Social en a Universidat Complutense de Madrit; Quique García, socilogo y doctorando en Antropolochía Visual, master de dirección y realización de documentals; Nereida Muñoz, investigadora de tradición oral y miembro d’a chunta de l’Instituto Aragonés d’Antropolochía; Laura Gómez Baquero, profesora en o grau de cine d’a Universidat Camilo José Cela; Sonia García López, doctora en Comunicación Audiovisual y especialista en Cine Documental; Jorge Moreno, representant de l’Asociación Espanyola de Cine y Vidio Scientificos (ASECIC); Ana Sánchez, de CINEMASCAMPO y representant d’ASECIC; y Montse Guiu March, directora de PICURT (Mostra de Cinema de Muntanya dels Pirineus).

Dimpués d’a triga d’o churau de preselección, con siet grupos de visionau, será o churau profesional l’encargau de fallar os premios Espiello, d’entre una vintena de documentals. O churau profesional lo integran “cinco personalidatz de prestichio d’o mundo cinematografico, audiovisual, antropolochico y cultural”, adhibe Patricia Español.

Convocau concurso cartel Espiello

Antiparte, a comarca de Sobrarbe convoca un concurso pa esleir o cartel que anunciará Espiello XII, Festival Internacional de Documental Etnografico de Sobrarbe y a portalada d’o programa de man. O plazo d’admisión d’as obras concluirá o 2 d’aviento y s’estableixe un unico premio de 600 euros. O fallo d’o churau se ferá publico antes d’o 10 de chinero de 2014.

Fuent: http://arainfo.org/2013/11/espiello-bate-un-nuevo-record-de-documentales-presentados-con-182-titulos/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.