Ester Quintana: ‘No soi a primera victima de balas de goma pero quiero estar a zaguera’

Ha compareixiu en a comisión parlamentaria sobre seguridat y uso de material antidisturbios

Ester-Quintana-Parlament-Catalunya-Imagen_EDIIMA20130711_0151_13

Foto: Parlament de Catalunya

Ester Quintana, a muller que perdió un uello por l’impacto d’una bala de goma d’os mossos d’esquadra mientres a vaga d’o 14 de noviembre de l’anyo pasau, ha compareixiu hue en a comisión parlamentaria sobre seguridat, orden publico y uso de material antidisturbios d’o Parlament catalán, pa pedir a prohibición d’as balas de goma. ‘Ixo que me pasó a yo, puede pasar-le a qualsiquiera. A o tuyo fillo, a tu mai. Yo no soi a primera victima d’as balas de goma, pero quiero estar a zaguera‘, ha dito a os parlamentarios.’

Quintana ha empecipiau explicando a suya situación personal y medica, y ha dito que no sabeba como podría executar un treballo y que feba ueito meses de baixa a cargo de su pai.

Ha criticau a comisión d’estudeo parlamentaria porque ‘solament menciona os prochectils pa decir que no los retirarán‘, y ha quiesto recordar que as balas de goma y mas prochectils no entendeban de dirección y yeran incontrolables. ‘Os achents d’a brigada mobil han dito a os chudgaus que quan disparan os prochectils no saben a on irán.’

Quintana, que ha insistiu que en o momento de recibir l’impacto no i heba garra alboroto, tamién ha cargau contra a Generalitat por a chestión d’o caso y ha reprochau que o Departamento d’Interior no s’intresase os primers diyas por o suyo caso. Y ha meso bell interrogant dencima d’a mesa. ‘Interior dició que no i heba habiu tiros, y dimpués l’habió de desmentir. Negoron que se disparasen balas de goma. Cómo pueden estar-ne seguros? A on son os informes que se’n facioron? Os achents encausaus han dito que dengún les preguntó sobre a suya actuación, y os suyos companyers se’n desentienden. Por qué se dispara prochectils ilegalment, sin respectar os protocolos? Ye que somos en guerra? Os policías han estau muit formaus? As balas de goma son os medios disuasorios adequaus? Por qué en garra caso no s’ha indemnizau a las victimas?’

S’ha queixau que en qualsiquier país democratico i habría habiu dimisions decamín y responsabilidatz. ‘Pero aquí, dica hue, dengún se’n ha responsabilizau.’

‘Una sociedat a on os ciudadanos tiengan miedo de manifestar-se no puede estar nunca una sociedat libre’, ha acabau decindo Quintana, que ha exichiu unatra vegada a prohibición d’as balas de goma.

Fuent: http://www.vilaweb.cat/noticia/4133186/20130711/ester-quintana-soc-primera-victima-bales-goma-vull-lultima.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.