Estudiants de Uesca se paran ta fer practicas de cooperación en Latinoamerica

Mientres a semana se fan charradas sobre cooperación ubiertas t'o publico

logoEstudiants d’o Campus de Uesca se son parando ta fer as suyas practicas en prochectos de cooperación en Latinoamerica. A Catedra de Cooperación t’o Desembolique d’a Universidat de Zaragoza coordina un ciclo formativo, sobre a realidat social d’os países d’o sur y a faina d’o voluntariau. A segunda parti d’ista formación, compuesta por charradas, ubiertas t’o publico, que fan integrants de diferents ONGs aragonesas, prencipia iste lunes 11 de marzo y se prolargará dica o chueves 14, cada diya a las 19 horas, en a Facultat de Sciencias Humanas y d’a Educación.

Vintisiet estudiants, más que más, d’ixa facultat y d’a de Sciencias d’a Salut y o Esporte, son en l’actividat, que ya fació sesions formativas previas, nomás ta inscritos, mientres o mes de febrer. Una parti d’istos estudiants ferán as suyas practicas mientre o estiu de 2013 en centros escolars de Archentina, Nigaragua y Republica Dominicana, en o caso de l’alumnalla de machisterio y en centros sanitarios de Perú, qui se forman en profesions vincladas t’a salut.

O lunes se ferá una charrada sobre “Parar-se t’a cooperación internacional” de man de María Rubio, participant en o prochecto Chimanamiento con León (Nicaragua). O martes bi habrá doble sesión formativa. Carlos Pablo, de Medicus Mundi, charrará  de maitins sobre “salut y interculturalidat“. De tardis, Felipe Soret, d’a Fundación Adsis, amanará t’os cooperants t’a experiencia personal que alporta la participación en istas iniciativas. O diya 13, Chema Leza, d’a ONG Entreculturas, afundará sobre os efectos que tien a cooperación en tornar os voluntarios t’o país suyo. O ciclo remata con a charrada de Enrique Cabezudo, de Unaqui, qui charrará sobre a “Educación t’o desembolique“.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.