Europa laica presenta a suya campanya sobre o IRPF

Demandan que no se marque en a declaración d'a renta ni a caixeta d'a ilesia catolica ni a d'as atras fins socials.

dipticoEuropa Laica ha presentau a suya campanya sobre o IRPF por cinquena anyada. En ella, igual como atras organizacions, demanda que no se marquen as caixetas t’a ilesia ni t’atras fins socials en as declaracions d’a renta que fa a ciudadanalla mientres istos meses. Tamién demandan que se saquen as dos caixetas y l’autofinanciación de todas as relichions.

A organización laicista ha presentau un informe a on que cifra en 11.000 millons d’euros as alportacions que recibe a ilesia catolica dende l’estau. D’una man en subvencions directas, y d’atra, en impuestos que deixa de pagar. En o comunicau califican como una ‘grau inchusticia’ y un atentau t’a libertat d’esmo y a igualdat de tracto ta totz os ciudadans en un pais aconfesional’ o goce d’istos privilechios. Tamién i fan contimparacions de cifras entre as retalladas y os diners destinaus t’a ilesia como os 600 millons d’euros retallaus en sciencia y investigación quan ixa cantidat ye a que se destina ta pagar a os catequistas catolicos en centros d’amostranza publicos y privaus.

Cuanto a la caixeta ta ‘fins socials’ remeran que parti d’ixos diners tamién van ta organizacions catolicas como Cáritas, por una valor de 120 millons d’euros. Europa Laica creye que ‘as fins socials son una qüestion d’estau y han de figurar en os presupuestos como resultau d’o debat presupuestario democratico y asignar-se en función de l’intrés cheneral.’ O metodo d’a caixeta, seguntes os laicistas, ‘resulta arbitrario’ y no queda guaranciada a obchetividat y equidat en conceder-se-ne’.

T’a rematar, Europa Laica fa una serie de demandas más chenerals sobre a claridat en as cuentas d’a ilesia, a denuncia d’os Alcuerdos con a Santa Siede y a demanda de l’autofinanciación establida en ixos mesmos Alcuerdos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.