Europa vota a favor de que cada Estau viede os cautivos OMG en o suyo territorio

Os colectivos ecolochistas advierten que ista decisión va a repercutir negativament en o sector agricola espanyol.

Panizal en Liechtenstein (Foto: Wikipedia)

Panizal en Liechtenstein
(Foto: Wikipedia)

O Parlamento Europeu ha votau a favor d’a nueva lei que dará a posibilidat a os Estaus miembros de restrinchir u viedar o cautivo de transchenicos en os suyos territorios. Amigos d’a Tierra, CECU, COAG, Ecolochistas en Acción y PALT, consideran que ista decisión va a repercutir negativament en o sector agricola espanyol con a dentrada masiva de cautivos transchenicos.

Espanya ye l’estau con mas superficie de cautivos transchenicos en a Unión Europea, muit por alto d’os atros quatro Estaus que producen comercialment organismos modificaus cheneticament (OMG), Republica Checa, Eslovaquia, Rumanía, y Portugal. En l’actualidat, i hai un solo cautivo transchenico permitiu en Europa, o panizo transchenico MON810 de Monsanto, pero con ista nueva lei, o Estau podría ubrir a puerta a muitas mas variedatz.

En iste contexto, a decisión final d’acceptar a propuesta sitúa a l’Estau Espanyol en una posición muit vulnerable. a lei achilizaría a tramitación d’autorizacions de nuevos transchenicos a ran europeu. Ta Espanya, isto significaría a dentrada masiva y incontrolada de cautivos transchenicos, contaminación transchenica d’a cadena alimentaria, y afectaría seriosament a o sector de l’agricultura ecolochica (con mas d’1,6 millons d’hectarias, 34.000 operadors y quasi quatro mil industrias en 2013 ).

Qué compromisos tecnicos conleva?

Existe a opción, que dependerá d’o Estau, que a primera valoración sobre viedar u no un cautivo OMG provienga d’as interpresas biotecnolochicas. Encara que os Gubiernos tamién pueden viedarr o cautivo sin a intromisión d’a industria. As organizacions denunciants critican a ideya que os Estaus soberanos y chestors de risgos pidan permiso a las interpresas ta tomar una decisión sobre os cautivos transchenicos en os suyos territorios.
Os gubiernos tienen o dreito de viedar grupos de cautivos transchenicos, ya sía por variedat de cautivo u por caracteristicas d’o mesmo, por eixemplo, todas las plantas de panizo transchenico u totz os cultivos transchenicos tolerants a herbicidas.
Os estaus pueden encetar a prohibición d’os cautivos tanto en o proceso d’autorización europeu como posteriorment, dica a duración total de 10 anyos. Amás, o gubierno puede devantar una prohibición existent sin previo aviso.
D’atra man, con a nueva lei, se corre o periglo de creyar una Europa “a dos velocidatz”: aquells Estaus mas sensibles ambientalment y mas preocupaus por a sostenibilidad d’a suya agricultura tendrán a posibilidat de viedar-los en o suyo territorio, mientras que atros Estaus miembros darán vía libre a la dentrada de nuevas variedatz transchenicas.

A propuesta no contempla a obligatoriedat de protecher os cautivos tradicionals y ecolochicos que puedan veyer-se afectaus, o qual implica un grieu risgo t’a biodiversidat, l’agricultura y l’alimentación.

Liliane Spendeler, directora d’Amigos d’a Tierra Espanya, ha sinyalau que “manimenos a situación d’Espanya, ista ye una gran oportunidat ta que o Gubierno zarre a puerta t’os cautivos modificaus cheneticament, y encaminar a nuestra agricultura enta un enfoque mas sostenible. A ciudadanía ha refusau de contino os cautivos modificaus cheneticament y empara una agricultura mas ecolochica y local. Ista nueva lei permite a os gubiernos estatals viedar todas as simients de panizo modificau cheneticament ta que Europa sía libre de transchenicos, y s’amenista aprofitar-la”. Ye por tanto importantismo, ha recalcau Spendeler que “o Gubierno d’Espanya siga a linia d’os países europeus y represiente de verdat a la ciudadanía y no a la industria biotecnolochica, refusando completament o cautivo de transchenicos en o país”.

Debant d’iste panorama, as organizacions firmants instan a o Gubierno espanyol a tomar as medidas necesarias ta viedar definitivament o cautivo y a experimentación con OMG en iste territorio.

Fuent: http://www.ecologistasenaccion.org/article29251.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.