Evo Morales nacionaliza quatro filials d’Iberdrola en Bolivia

'Nos i hemos visto obligaus ta equilibrar a tarifa electrica urbana y a rural', diz o president boliviano

evoO president de Bolivia, Evo Morales, ha promulgau un decreto por o qual expropia as accions d’Iberdrola en dos distribuidoras d’enerchía d’as rechions de Paz y Oruro, en una interpresa de servicios y en una chestora d’inversions. ‘Nos hemos visto obligaus a prener ista mida ta que as tarifas d’o servicio electrico sían equitativas en os departamentos de Paz y Oruro y a calidat d’o servicio electrico sía uniforme a l’aria rural y en l’aria urbana‘, ha dito.

Morales ha dito que a mida ‘guaranciará o dreito humanitario (a la electricidat) d’os ciudadanos de l’aria rural’, y ha criticau o cobro de tarifas ‘deficient y desigual’ en Paz y Oruro, remerando que en l’aria rural se paga por a electricidat mas d’o doble que en l’aria urbana.

As dos distribuideras, Electropaz y Elfeo, pasan a formar parte d’a Interpresa Nacional d’Electricidat boliviana (ENDE), y se mete asinas fin a la presencia d’Iberdrola en Bolivia.

O decreto guarancia a continuidat laboral d’os treballadors de base d’as interpresas electricas, pero no a d’os directivos y personal de confitanza, seguntes ha explicau Morales. Amás, ENDE podrá fer servir a fuerza publica ta guaranciar a distribuición d’enerchía a las rechions de Paz y Oruro.

O mes de mayo pasau, Morales ya sinyó un decreto de nacionalización d’as accions d’una filial de Red Eléctrica de España.

O gubierno espanyol lamenta a decisión y insta a que s’alcuerde una ‘chusta indemnización’

O gubierno espanyol, a traviés d’o Ministerio d’Afers Extranchers, ya s’ha pronunciau sobre a decisión d’o president de Bolivia, Evo Morales, de nacionalizar quatro filials d’a enerchetica Iberdrola. En un comunicau, o ministerio encabezau por José Manuel García-Margallo lamenta a mida y advierte que aspera que o proceso d’evaluación d’a valor d’a interpresa se faiga seguindo ‘criterios exichents’ ta que a parte afectada obtenga una ‘chusta indemnización‘. O gubierno espanyol confita en que as relacions entre os dos países s’alazeten en a plena cooperación, información y franqueza, y advierte que a seguranza churidica ye una exichencia ‘inevitable’.

Fuent: http://www.vilaweb.cat/noticia/4069679/20121229/evo-morales-nacionalitza-quatre-filials-diberdrola-bolivia.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.