Exichen que l’auditoría enerchetica municipal no cueste diners a o Concello de L´Aínsa

O concello d'a localidat podría pagar 24.000 € por una auditoría sobre l'alumbrau publico d'a localidat

Plaza en L'Aínsa (Foto: Dudua)

Plaza en L’Aínsa (Foto: Dudua)

O grupo municipal d’IU en o Concello de L’Aínsa denuncia que l’alcalde d’a localidat altoragonesa ye disposau a pagar una factura de 24.000 euros por un contracto por prestación d’o servicio d’auditoría enerchetica y medioambiental pa l’alumbrau publico d’o municipio. En iste sentiu a concellera d’IU, Marisa Ventero, ha sinyalau que “ye inadmisible que l’alcalde chustifique o pago d’o mesmo sobre a base d’un compromís moral con a interpresa a la que ell mesmo le adchudicó o contracto sin contar con os grupos municipals y que as suyas clausulas imposaban que, pa privar o pago d’o mesmo, se quitase a publica concurrencia una posterior licitación pa lo mantenimiento y millora de l’alumbrau d’a localidat”. Ventero ha continau dicindo, que “a ideya d’ixe contracto ye que a interpresa externa que resultase adchudicataria d’iste pliego pa lo mantenimiento y millora de l’alumbrau municipal habría d’asumir o coste d’istes 24.000 euros”.

Pa la concellera d’IU “l’alcalde ha estau neglichent en ista chestión, ya que si quereba externalizar por medio d’una interpresa privada o mantenimiento y a millora d’o servicio d’alumbrau, qüestión que nusatros no compartimos, habría d’haber proposau a o Pleno o estudeo de l’auditoría antes de contractar y adchudicar, presentando un pliego de condicions en que s’incluise l’auditoría como parte d’o mesmo y que todas as interpresas que se presentasen a o concurso pa realizar ista auditoría, tenesen a posibilidat de fer-la, pero asumindo o coste d’a mesma en igualdat, a la marguin que os pliegos pa lo  mantenimiento y millora de l’alumbrau municipal se licitasen u se quedase desierta a suya adchudicación, o que hese supuesto que o Concello, baixo garra concepto pagase iste estudeo”.

Por ixo, Izquierda Unida ha solicitau información sobre o procedimiento de contractación d’ista auditoría y sobre as clausulas d’o mesmo, porque entiende que podría vulnerar-se a legalidat d’ista mena de procedimientos de contractación. “En qualsiquier caso -ha continau Ventero- o nuestro grupo municipal va a colaborar en a busca d’una solución que prive a la localidat sufragar iste gasto que, pa lo unico que ferá honra, ye pa que una auditoría quede dentro d’un calaixo municipal”.

En a suya opinión, “en politica a moral y a etica ye important, pero somos pa defender a legalidat y os intreses chenerals de L’Aínsa y no a moralidat de qui tien decidiu de pagar d’os diners d’os contribuyents 24.000 euros, que con una negociación adequada, s’hese privau”.

Fuent: http://arainfo.org/2013/10/exigen-que-la-auditoria-energetica-municipal-no-cueste-dinero-al-ayuntamiento-de-lainsa/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.