Exito d’a Marcha Minera: decenas de mils de treballadors toman as carreras de Madrit

Ahiere de nueitz, Madrit estió testigo d'arribada d'a Marcha Minera dende esferents puestos de l'Estau, en una nueit de gran emoción y intensidat

Foto: Lorien G.

Hue yera o día sinyalau, o día en o que as marchas mineras de tot l’Estau confluyeban en una sola marea negra en Aravaca, ta eslizar-se en una marcha nocturna, arropada por o Madrit solidario, ent’o nuclio d’o problema y a suya solución. En os prolegomenos, as columnas aragonesa, andaluza y manchega s’heban uniu en Alcobendas y dende astí iste maitín ent’as columnas lionesa y asturiana; a totz ells se les sumaban aquellas personas mineras que no heban puesto unir-se a la Marcha Negra. Y en os despachos, o Tribunal Superior de Chusticia de Madrit autorizaba finalment a la marcha minera a acceder ta Madrit por l’A-6 y no por a M-500, permitindo-le pasar por debant d’a Moncloa.

Arredol d’a meya t’as ueito, dimpués d’un rato adedicau a o reposo y a la reflexión (o ”qué fer dimpués” que tantos desvelos creya en as cuencas, en os encierros y en as marchas), y en bell meyo d’un estrapalucio enxordecedor de petardos, rancaba a zaguera etapa d’o recorriu que mientres deciueito días ha levau a cients de miners por as carreteras de meya peninsula. Baixo un sol abrasador, rondando os 38 graus a la hora en que se retomaba o camín, a protesta abanzaba por l’A-6, precedida por un fuerte destacamento policial y un vehíclo d’os servicios municipals que reservaba un u dos carrils – dependendo d’a zona- t’o discurrir d’a manifestación. Dende Moncloa dica l’altura d’a UNED, no i heba pasarela, puent u recoveco de l’arcén que no hese estau preso por a chent solidaria de Madrit ta penchar pancartas y asperar dende astí a plegada d’a columna. Y finalment, arredol d’a meya t’as nueu, a Marcha Negra efectuaba a suya dentrada en o casco urbano de Madrit; dos columnas de miners, con os sinyals d’as cuencas (Llión, Bierzo, Aragón, Andalucía, Asturies), practicament en formación, plenas de rostros cansos pero exultants, veyendo como dende dos kilometros antes de no plegar en a capital cients de personas les aguardaban ta sumar a o ya muit numeroso corteixo que les acompanyaba dende Aravaca; “bueno, ganar cal ganar, pero isto ya compensa”, nos reconoixeba un d’os miners aragoneses integraus en a marcha.

Dende allí, a comitiva continó a caminata, pasando por o Palacio d’a Moncloa (“a espelunga d’Alí Babá, astí ye” yera un d’os canticos mas repetius) y ya en bell meyo d’una contina ovación d’a chent de Madrit y de tot l’Estau que heba acudiu a recibir-les de feito, totz dos carriles reservaus por o Concello ta la marcha se quedoron curtos y estreitos, y l’A-6 se quedaba reducida en a suya dentrada ta Madrit a un carril que a duras penas compartiban manifestants y automobils mientres, ixo sí, os autos que veniban en dirección contraria daban continos bocinazos como muestra d’emparo. Yera a l’inte de zarrar a primera fase d’a toma de Madrit por a Marea Negra, aconseguindo arredol d’a meya t’as diez a Ciudat Universitaria, en que o suyo recinto esportivo – instalacions de l’INEF – cenarían os miners y as suyas familias, parando-se t’a venient fase, a marcha dica Sol. Entremistanto, o zarre “a cal y canto” dictau d’o recinto por a organización t’a chent minera daba scenas mesmo curiosas, como o momento en que Pedro Zerolo pasaba o control mientres parte d’a chent que se quedaba difuera coreyaba “No sé en qué pozo / treballa Zerolo“, que emotivas, como a dentrada d’as ambulancias que heban feito a final d’o camín con miners accidentaus en o transcurso d’a marcha.

Entremistanto, lo mesmo a chent que les heba acompanyau en o suyo zaguer tramo que as primeras personas y toda mena de colectivos que s’amanaban a la convocatoria planteyada por o Grupo de Refirme a la Marcha Minera, empecipiaban a chuntar-se en a Plaza d’o Cardenal Cisneros, a tasament cincocientos metros d’as instalacions en as que se paraban os miners. Manimenos, o lochico retardo d’a salida, dau a cansera d’os participants d’a marcha con quasi mes y meyo en as suyas garras, feba que se dase un bloqueu espontanio d’a dentrada d’a Carretera d’A Coruña, orichinar bell momento de tensión con os conductors, y causando importants atrasos en os autobuses de l’Intercambiador de Moncloa. No sería dica a meya t’as once d’a nueit, alto u baixo, que se retomaría a ruta, ista vegada ya enta Sol, con os grupos de refirme dispersos: uns cients de personas en a puerta d’as instalacions esportivas d’a Complutense, uns pocos mils en Cardenal Cisneros y a resta empecipiando-se a concentrar en Moncloa. Estió en iste momento quan s’empecipioron a vivir os momentos mas intensos d’a nueit, con os miners abanzando con “o Santa Barbara Bendita” de fundo, con os suyos candils alumbraus y un corredor de mils de personas en un aplauso contino esgarrau con os vivas a la clase obrera, a la luita minera y a o papel d’a solidaridat en a luita. Chents d’o 15-M, sindicalistas d’a mayoría u d’a minoría, independentistas, republicanos, royos y negros, chovens, tercera edat, d’aquí de Madrit u d’allí a on sía, anonymous, se convertiban en una composición borrosa de rostros emocionaus y unius en un chilo de solidaridat baixo o tintilar d’as luces en os cascos. Pero isto no yera que o prencipio.

En efecto, o gran momento plegaría con a Dentrada en Moncloa, a on arrienda de madrilenyas s’heban concentrau, sin acudir a la trobada d’a marcha. Dificil de calcular, pero estimable en bellas decenas de mils de personas, a multitut trencaba en un fuerte chilo quan os miners s’internaban en a plaza y agora sí, tomaban Madrit. Dende astí continaba una marcha lenta, emocionant y intensa con una multitut copando as prencipals arterias d’a capital de l’Estau, mientres que os protagonistas, os miners, abanzaban a duras penas entre a chent. Una manifestación que como todas, da de sí ta cantar, por eixemplo O Canto a la Libertat, coreyar y tamién ta charrar. Miners en vada y recientment plegaus dende Asturies comentaban cómo en os zaguers anyos ha disminuyiu dramaticament l’aduya a o sector, mientres que dengún – sindicatos mayoritarios, interpresa, gubiernos u Europa -, no les daba a mas minima explicación de cómo reconvertir as cuencas d’una traza eficaz; asinas as cosas, se preguntaban, ta continar entabant, “qué cal fer?”. Mientres, china-chana, a manifestación nocturna plega pasada a meya t’as dos ta una Puerta d’o Sol repleta y lista ta entonar, una vegada mas, o “Santa Barbara Bendita”.

Mas respuestas, maitín.

Lorien G.

Vidio “Canto a la Libertat” por os miners

 

Fuent: http://arainfo.org/2012/07/exito-de-la-marcha-minera-decenas-de-miles-de-trabajadores-toman-las-calles-de-madrid/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.