Exito d’a vada cheneral estatal en as redoladas mineras

Seguimiento masivo en totz os sectors en as redoladas mineras seguntes os sindicatos y pocos incidents en a vada convocada en refirme a o sector minero.

18 junio, 2012 | Andorra-Sierra d'Arcos, Cuencas meneras, Politica, Redoladas | Autor: Arredol | Tweet

A Guardia Civil cusira o piquete ent’a central termica d’Andorra. Foto: AraInfo

Exito total d’a vada cheneral convocada a ran estatal en as redoladas mineras. Os sindicatos fablan de seguimiento masivo tanto en a minería como en a resta de sectors laborals. A vada cheneral estió convocada en refirme a o sector d’a minería, en periglo por os retalles d’o gubierno en os Presupuestos Chenerals de l’Estau. Hue se votan en o Senau os retalles referents a la minería, a on podría crebar-se a disciplina de voto en o seno d’o PP.

En as redoladas mineras d’Asturias y Lión, o seguimiento ha estau masivo y sin incidents graus. Os piquetes informativos no han habiu quasi d’actuar, amás d’a existencia d’una graniza presencia policial. A Guardia Civil ha contau con 250 achents mas hue. Unatra vegada s’han devantau barracalas ardendo y s’han tallau arrienda de carreteras y vías ferroviarias. Tanto en a industria como en comercios y amostranza, l’ature ha estau prou masivo en cheneral. En Lión s’ha feito una manifestación de tardis que ha contau con l’afluencia d’unas 15.000 personas, amás d’un homenache a os miners enzarraus en o Pozo Sta. Cruz (Sta. Cruz de Sil).

En as redoladas mineras aragonesas, a vada cheneral tamién ha estau considerada un exito. Centros d’amostranza, comercios, industrias, apareixeban sin quasi actividat en cheneral. S’han tallau bellas carreteras con barracalas de pneumaticos ardendo, sin incidents. Asinas mesmo, os piquetes han estau desplazando-se por Andorra, Alcorisa u Calanda prebando de zarrar os pocos comercios que yeran ubiertos. En Andorra, os miners s’han posau y han tallau a carretera d’acceso t’a central termica d’a localidat,  pero, a tamás de contar con permiso ta realizar o piquete, os antidisturbios d’a Guardia Civil han disuelto a os miners, que en un primer momento s’han negau a ir-se-ne. A Guardia Civil ha procediu a identificar a totz os treballadors y los ha quitau d’a carretera uno a uno a la fuerza. L’acción ha estau criticada por os sindicatos que la han considerada “desproporcionada”. A posada en a carretera yera “pacifica y mas simbolica que efectiva”, seguntes o secretaire provincial d’a federación d’Industria d’UGT, Aurelio Rodrigo. Tamién i ha habiu refirme dende chicotz interpresaires d’a redolada d’Andorra, en Alcorisa, amás como d’atros colectivos como a Marea Verda baixoaragonesa.

Manifestación en Andorra. Foto: AraInfo

A las 19 h. en a Pza. Regallo d’Andorra s’ha convocau manifestación con o refirme de chent de todas as redoladas mineras, asinas como d’a resta d’o país, arroclando-ie a unas 4.000 personas. Dende atros puntos d’o país y de l’Estau tamién s’han convocau manifestacions y concentracions en refirme a la vada minera. Mesmo s’ha plegau dillá, en Chirona s’ha plegau a tallar con pneumaticos ardendo l’AP-7 en solidaridat con a vada.