Exito d’a vaga cheneral en educación

A reforma educativa (LOMCE) empentada por o ministro Wert no pasó por o Consello de Ministros hue dimpués d'as masivas movilizacions d'ahiere

IMG_7000

Cabecera d’a manifestación de tardes en Zaragoza

Estudiantalla, profesorau, pais, mais y personal d’administración y servicios yeran ahiere convocaus a vaga cheneral en tot l’Estau en o sector educativo en contra d’a tramitación d’a polemica LOMCE (Lei Organica ta Millora d’a Calidat Educativa) d’o ministro d’educación Wert. As cifras de seguimiento han estau masivas, en Aragón arredol d’un 60-70% en infantil y primaria, un 80% en secundaria y un 90% en a universidat, seguntes os sindicatos convocants (CGT, STEA, UGT, CCOO). O Gubierno daba unas cifras de seguimiento d’un 30%, ya que contaban tamién con os centros concertaus y privaus a on i habió un baixo seguimiento.

OLYMPUS DIGITAL CAMERA

Concentración debant d’a consellería d’Educación aragonesa

Ya de maitins prencipiaban os piquetes en os esferents centros educativos sin que se producesen incidents a destacar. En Zaragoza, columnas marchaban dende os centros escolars ta Pza. S. Francisco a on se chuntaban con as personas que yeran en a universidat a las 11 h. ta prencipiar una manifestación masiva que plegó dica a consellería d’Educación, con arredol de 25.000 personas que chilaban de vez “consellera dimisión”. Bellas personas deixiron debant d’a puerta, cusirada por os antidisturbios en rematar a marcha y leyer o manifiesto, unos “tupperware”, en refirme a las cinco personas que serán chudgadas por un “escrache” con “tuppers” debant d’a casa de Dolores Serrat. Bellas personas de Marea Verda, tornando d’a consellería, plegoron a pasar en manifestación por a carrera Alfonso, a on ye o domicilio d’a consellera, ya que Delegación de Gubierno vieda que pasen manifestacions por a dita carrera dende ixe “escrache”.

IMG_7005

Manifestación de tardes en Zaragoza

De tardes yera convocada atra manifestación con un tamién seguimiento masivo (unas 25.000 personas) a tamás d’a fuerte plevia que cayó en a capital aragonesa. Se leyó o comunicau y unas 300 personas dimpués d’a marcha facioron un “escrache” espontanio a la consellera debant de casa suya mientres bells minutos.

En Uesca, unas 2.000 personas se manifestoron tanto de maitins como de tardes tamién baixo a plevia, con representants de centros escolars rurals que son sufrindo con fuerza os retallos, podendo trancar belunos o venient curso. En Teruel, os sindicatos destacoron que puyó l’indice de participación en a vaga arredol d’un 10%. En os lugars, a participación puyó d’o 50%, estando as Cuencas Mineras as que tenioron un mayor seguimiento con un 63% de media y un seguimiento muit alto de l’alumnalla. En a resta de l’Estau tamién i habió un gran seguimiento a la vaga y movilizacions masivas.

Tanto os sindicatos convocants como atros colectivos como Marea Verda, Purna, Universidat u CEPA calificoron a chornada d’exito. De feito, a LOMCE no pasará por agora por o Consello de Ministros tal y como yera previsto. Manimenos o sindicato CGT convocará tres diyas mas de vaga, o 15, 22 y 23 de mayo con os obchectivos de mantener a ESO y a FP superior en as zonas rurals, evitar a FP de pago y l’aumento de 21 horas lectivas en secundaria u a millora d’os contractos d’interinos con o cobro d’o verano como yera alcordau entra atras demandas. Marea Verda Aragón ya ha decidiu de sumar-se a istas convocatorias y demanda a atros colectivos y sindicatos a fer o mesmo.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.