Exposición de clasicos meyevals y libros de caballerías en o Campus de Uesca

A biblioteca conta con más de 20.000 volumens. En a exposición, que durará dica o 30 d'abril, s'amuestran beluns d'os exemplars más intresants

cartel

Dende iste lunes 11, o Campus de Uesca amuestra en una exposición una triga de clasicos meyevals y libros de caballerías procedents d’a colección de Humanidatz d’a Biblioteca universitaria uescana. “Os caballers d’a biblioteca” ye o suyo titol y se podrá vivitar dica o 30 d’abril.

As portaladas de decenas de volumens charran de personaches como o rei Arturo, Merlín, Roldán, o caballer Zifar, Tirant Lo Blanch, Don Quixot u a reina Sibila. Tamién charran d’os cataros, o Santo Gredal u as sagas islandesas. Son parti d’a colección d’a titulación d’Humanidatz que incorpora a suya biblioteca.

L’edificio universitario d’a Facultat d’Interpresa y Chestión Publica aculle, chunto a los estudios que pertocan a o centro, as amostranzas humanisticas d’o Campus y os suyos fundos bibliograficos. Os estudios d’Humanidatz, de larga trachectoria en a ciudat, han conformau una notable colección que tien más de 21.000 volumens.   A biblioteca, con l’obchetivo de fer conoixer istos fundos y que se valuren como cal ha trigau parti d’as suyas obras meyevals y atras de sieglos posteriors que preban de recreyar as historias de caballers.

Entre as obras, os organizadors destacan o “Libro d’a Orden de Caballería” de Ramón Llull, autentico manual d’o futuro caballero, escrito en 1274, y que se’n amuestran de traza deseparada os textos y as ilustracions. Tamién en fa parti una “Triga de lecturas meyevals”, colección que publicó a Editorial Siruela en as anyadas 80 y que bi incluye buena parti d’os libros d’o clamau “Ciclo Arturico” en edicions muito cudiadas, con traduccions y introduccions de man de expertos en literatura meyeval como Carlos Alvar, Victoria Cirlot, Luis Alberto de Cuenca u Francisco Torres Oliver. Entre ellas, La muerte de Arturo, de Sir Thomas Malory, Vida de Merlín; de Geoffrey de Monmouth, u O cuento d’o Gredal, de Chrétien de Troyes.

A muestra tamién aculle, fendo un blinco en o tiempo, bells quantos “libros de caballerías”, chenero de gran exito en Europa entre os sieglos XV y XVI, entre os que i son Amadís de Gaula, El caballero del Febo, Tirante el Blanco u atras obras a on que s’inspiró Don Quixot d’a Mancha, obra cumbre d’a literatura castellana que tamién ye present en la exposición.

O catalogo d’a exposición editau  por a Biblioteca sinyala, entre os obchetivos d’a muestra, “fer viyer que, de bella traza, istos libros continan estando de actualidat” porque “hue más que no nunca, cal esfender as valors que se i amuestran y que son tan maltractadas como a chusticia, a verdat, a honor, a leyaltat, l’amistat, l’esfuerzo, a valura u a compasión”. “Nos cal esdevenir nuevos caballers y luitar contra istos monstruos tan humans que reinan hue: l’angluzia, a bamba, a envidia, a mentira intresada, o refus por o desvaliu, o medrar sin mirar-se a qui s’escacha ta puyar en o poder”, remata decindo lo catalogo.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.