FABZ y ADSPA protestan por as deduccions en o IRPF t’os seguros medicos privaus

As dos organizacions creyen que a sanidat publica resulta perchudicada por iste alcuerdo

Rudi y Biel (Foto: D.Ch.A.)

Rudi y Biel (Foto: D.Ch.A.)

L’Asociación t’a Esfensa d’a Sanidat Publica d’Aragón (ADSPA) y a Federación de Asociacions de Vicos de Zaragoza han denunciau iste domingo os efectos negativos t’a sanidat publica que tendrá, en a suya opinión, l‘alcuerdo d’a D.Ch.A. ta aplicar rebaixas fiscals en o Impuesto d’a Renta d’as Personas Fiicas (IRPF) por seguros medicos t’o 2014.

L’alcuerdo estió presentau de conchunta por Luisa Fernanda Rudi (PP) y José Ángel Biel a semana pasada. Ta istas organizacions, istas desgravacions “suposan a subvención de man de totz os ciudadans, de seguros de bellas personas, lochicament aquellas que tienen mayors ingresos, qui son as que se pueden permitir un seguro privau, lo que pareixe de tot irracional y un atentau contra la equidat.”

Antimás, ADSPA creye que “baixan os ingresos fiscals favoreixendo l’aseguramiento privau, ye decir l’esquilmen d’istas interpresas. Baixar os ingresos fiscals suposa de traza clara fer periglar a sostenibilidat d’o mantenimiento d’os servicios publicos. Si queremos servicios publicos de calidar, cal guarenciar os recursos necesarios ta ello, y alavez, a fiscalidat”.

Ta rematar, opinan que ye “paradochico que istas propuestas surtan dende os responsables de guarenciar a calidat d’os servicios sanitarios publicos” y creyen que o gubierno PP-PAR quiere “esbarrar un mayor porcentache d’a población ent’o sector privau.”

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.