Fairphone, o telefono intelichent y chusto

Una ONG holandesa quiere fabricar estianyo un mobil que prioriza a las personas y a o medio

fairphoneCada anyo qualques organizacions no gubernamentals aprofitan l’atención mediatica d’o Mobile World Congress (MWC) de Barcelona ta denunciar a implicación d’ista industria, mas intensa u no tanto, en l’orichen de conflictos armaus en Africa u en as duras condicions laborals d’interpresas subcontractadas por o sector en Asia. Fa tres anyos, por eixemplo, s’activó en os Países Baixos una d’istas campanyas de conscienciación, pero bien luego optó por una vía tant inexplorada como innovadora: deixar de manifestar-se difuera d’o MWC y entrar-ie ta mirar-se de construir un ‘fairphone‘, un mobil chusto.

‘Fairphone naixió como una campanya de conscienciación sobre qualques abusos orichinaus por a industria d’o mobil, pero siempre teniemos present a ideya de desembolicar un producto, un telefono, nusatros mesmos.’ L’explica o mallorquín Miquel Ballester (Palma, 1983), un d’os ueito treballadors: entró fa quasi dos anyos ta acabar o prochecto de final de carrera d’o master en disenyo estratechico y tecnolochías t’o desembolique sostenible que feba en Amsterdam, y agora en ye a cabeza de productos estratechicos. Ta que l’aparato sía intelichent y chusto, detalla, han de confluir cinco grans valors: buenas condicions laborals en a fabricación, ausencia de materials conflictivos, ciclo de vida limpio, tecnolochía ubierta y libre y muita transparencia.

Ta fabricar un mobil, paroron cuenta que ta Fairphone, a estructura d’ONG no yera a millor opción. Por ixo han evolucionau enta una interpresa social: ‘As cosas cambean muito si yes una interpresa, porque deixas d’estar una ONG que denuncia cosas y pasas a estar un client. Y como client, encara que sía de baixa escala, ya puetz imposar uns ciertos requerimientos, fer as cosas d’una cierta traza. Ta nusatros, fabricar o mobil ye fer una ferramienta, una ferramienta ta trobar os mesmos problemas con que se’n troban as atras interpresas y veyer si podemos priorizar as nuestras valors socials en tot iste proceso y fer servir d’eixemplo a o sector‘.

Ya como interpresa social, Fairphone concara l’anyo 2013 con l’obchectivo de materializar iste mobil chusto. Ya tien a companyía china A’Hong (sozmesa a una auditoría social) presta ta fabricar-ne as primeras vint mil unidatz y, gracias a una campanya de pre-pedius iste mayo y chunio, ya s’han reuniu os diners necesarios ta activar a producción. Si no i hai problemas, pues, Ballester confita que en agüerro plegarán os primers ‘fairphones’ t’o mercau europeu, l’unico a on por agora se treballa. O pre ye de 325 euros, que se desglosará en a web con tot luixo de detalls seguindo o criterio de transparencia: quánto s’ha gastau en marketing, quánto en viaches ta China, quánto en components y materials… ‘Creyemos que estar radicalment transparents tien una valor ta bella chent y ye ista chent a que nusatros nos miramos de trobar.’

Ballester comenta atro exercicio de transparencia: ‘Una d’as primeras cosas que queremos fer antes d’o verano ye desmontar o telefono, amostrar as piezas y empecipiar a investigar a on son as substancias periglosas en a electronica, en cheneral, y en o nuestro mobil, en particlar. Ta nusatros ye complicau, a vegadas, de saber a on son istos components y por ixo queremos ubrir un proceso colaborativo con a chent d’a nuestra comunidat. Sé que o nuestro mobil cumplirá toda a lechislación europea, ye claro, pero tamién sé que i hai muitas substancias que no amaneixen en a regulación d’a UE y lo quiero mirar: por eixemplo, si os cables que femos servir contienen PVC u no. Queremos estar muit honestos con tot ixo que i trobamos.’

O proceso de fabricación de Fairphone ye tant transparent como ubierto, ta satisfacer a un sector de consumidors conscienciaus y, de vez, ta conscienciar a la industria ta que sía mas responsable con as personas y o medio. Una gran filosofía resumida en un breu lema: ‘Merca un mobil y enchega un movimiento!’

Fuent: http://www.vilaweb.cat/noticia/4122212/20130610/fairphone-telefon-intelligent-just.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.