Falkland contra Malvinas

Hue fa trenta anyos d'a invasión archentina d'istas islas baixo sobiranía britanica a l'Atlantico sud.

Prisioners d'a Guerra d'as Malvinas. (Foto: Wikimedia Commons)

Son dos islas prencipals que suman 12.173 km2 y las habitan un millón de pingüins, seicientas mil ovellas, tres mil cient quaranta personas y menos de dos mil soldaus. Manimenos, fa sieglos que Archentina y a Gran Bretaña se las disputan. Y ye que as Falkland, u Malvinas, son un puesto tant valuroso estratechicament como economicament de l’Atlantico sud. Hue fa trenta anyos de que a chunta militar archentina en o poder se cavase a fuesa ninviando a l’exercito a ocupar as islas, baixo administración britanica dende o 1833. Empecipiaba asinas una guerra breu y cruenta: d’o 2 d’abril a o 14 de chunio d’o 1982 perdioron a vida 649 soldaus archentins y 258 de britanicos, amás de tres civils. Y mas de 450 ex-combatents archentins y amán de 300 de britanicos s’han suicidau dende alavez, incapables de superar o trauma.

Dimpués de setanta y quatro días de combate as tropas archentinas, que habioron de sobrevivir en condicions meteorolochicas muit adversas, plegoron reblando y acceleroron, de retruque, a caita d’a dictadura militar archentina, chusto l’anyo siguient.

 

Por muito que totz dos países vaigan reprener as relacions diplomaticas o 1989, a tensión contina muit viva por a sobiranía d’as Fakland. Por Archentina, as Malvinas son una prolongación d’o país y, de feito, tiene incluius os 12.173 km2 d’o archipiélago dentro d’a provincia de Tierra d’o Fuego, como se plasma en o suyo sinyal, an ye a silueta de todas dos islas prencipals, Soledad (6.353 km2) y Gran Malvina (4.377 km2), chunto a las deshabitadas islas Cheorchia d’o Sud y Sandwich d’o Sud, tamién baixo sobiranía britanica y tamién reclamadas por Archentina. De feito, pareixe que a purna que fació esclatar a guerra d’as Falkland s’enchegó, dos semanas antes, en iste atro puesto remoto de l’Atlantico sud.

 

A posición de Gran Bretanya respective a las Falkland ye identica a la que mantien en todas as suyas posesions territorials espardidas por o mundo: a sobiranía no ye negociable mientras que os habitants d’as islas quieran continar estando britanicos. Actualment, os tres mil islencos tienen una renta per cápita de 25.000 dolars, a mas alta de l’América d’o Sud y una d’as primeras d’o mundo. As autoridatz archentinas, por a suya parte, no han renunciau nunca en as Malvinas y istes zaguers tiempos s’ha dedicau a denunciar tanto una supuesta militzaritzación d’a zona como a presencia de companyías petroleras britanicas en auguas de l’Atlantico sud, en busca d’unas reservas de hidrocarburos que han devantau muitas expectativas.

 

A resultas d’o bloqueo aerio y marítimo que mantiene Archentina, a vía de dentrada y de salida d’as Falkland ye prencipalment Chile, dende an i hai un vuelo periodico fletau por a companyía Lan Chile. Dende fa anyos, precisament, s’ha establiu en o archipielago una important comunidat de treballadors chilens, formada por uns trecientos individuos provenientes, a mayoría, de Santiago de Chile y de Punta Arenas.

Fuent: http://www.vilaweb.cat/noticia/3999533/20120402/falkland-malvines.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.