‘Fambre de vivienda’ levanta o campamento

O campamento de Stop Desafiuzamientos Zaragoza en a Pza. Aragón se levanta dimpués d'haber consiguiu que as entidatz bancarias negocien una solución

hambrevivienda-B-stop-desahucios-c-300x300

Foto: Stop Desafiuzamientos Zaragoza

Con a concentración de hue a las 12.00 horas en a plaza d’Aragón, a plataforma Stop Desafiuzamientos meterá punto y final a o campamento ‘Fambre de vivienda‘ que entre diez días ha estau instalau en ista centrica plaza zaragozana. Diez días d’actividat y denuncia contra Kutxabank (BBK y Kutxa) y Bankia.

“A decisión que iba a prener-se iste chueves 11, ha estau abanzada dimpués de consiguir un alcuerdo de negociación con responsables d’a entidat Kutxabank, pa que puedan ascuitar y valurar as nuestras proposas, y asperamos, que puedan ufrir una solución digna pa totz y todas” sinyala Stop Desafiuzamientos en un comunicau. Advogaus d’ista plataforma han charrau hue y alcordau una cita con interlocutors d’as entidatz financieras que vienen de Bilbo, pa apanyar o conflicto, o venient martes.

“Miguel, afectau de Bankia, consiguió gracias a la presión, que o responsable de risques de Bankia de Madrit, retomase a proposa de dación en pago y confirma contestación pa iste viernes. Rosa, Marta y Luis asperarán a mirar como confluye a reunión d’o martes. Como que ells se meten a negociar, nusatros levantamos o campamento” adhibe o comunicau.

En parolas de Stop Desafiuzamientos: “Os nuestros companyers y companyeras siguen con fuerza y determinación de no aturar. Sabemos que o campamento ha cumpliu uns obchectivos muit dignos: fer vistera un mala politica bancaria y una realidat humana dramatica y sangrant como os desafiucios en pleno centro de Zaragoza y forzar a ixos directivos, que en atras ocasions no ascuitan, a ascuitar-nos y entender que no imos a aturar, dica que se solucionen os problemas que ells han creyau a traviés de l’enganyo y a estafa”.

A plataforma sinyala que “dende hue, ya s’han planteyau nuevas accions estratechicas si as negociacions no plegan a buen puerto”.

Pa rematar, Stop Desafiuzamientos manda un mensache d’agradeiximiento “a os companyers y companyeras que solidariament s’han sumau a la vaga, que han participau en as accions de denuncia contra as entidatz, que nos han visitau y dau aliento en ista semana acompanyada de muita calor y muitas emocions. Gracias a todas por fer posible a luita”.

Fuent: http://arainfo.org/2013/07/hambre-de-vivienda-levanta-el-campamento/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.