Fan una enqüesta global sobre l’uso de l’aragonés en Internet

A enqüesta permitirá estudiar bells aspectos sociolingüisticos poco estudiaus en l'aragonés

pantallazoPor primer vegada s’empenta una enqüesta global sobre l’uso de l’aragonés en Internet. En iste caso, o grupo de treballo en Tecnolochías Lingüisticas de l’Aragonés (TecLiAR) ha feito un qüestionario con bellas preguntas con l’obchectivo d’analisar os usos, tendencias y motivacions que tienen os charradors y charradoras d’aragonés en Internet.

Ya existe estudios desembolicaus con enqüestas d’ista mena en atras luengas minoritarias (como os que s’han feito sobre o galés y o esperanto), pa conoixer con datos directos d’os usuarios as suyas opinions, conoixencias, preferencias y costumbres en un contexto tan amplo, dinamico y complexo como ye Internet y os retz socials.

Amás d’os temas mas relacionaus con l’uso de l’aragonés en Internet, o treballo permitirá d’estudiar bells aspectos sociolingüisticos poco estudiaus en l’aragonés como, entre atros, a importancia d’os diferents ambitos de relación (familia, treballo, asociacions, internet) en a divulgación y socialización d’a luenga, a relevancia d’as tecnolochías lingüisticas, as motivacions pa fer servir y/u aprender a luenga u o modelo de luenga (variedatz emplegadas, grafías, forma d’aprendizache, evolución d’o modelo dende que s’aprendió, etc).

Asinas, en poco más d’una chornada de vida, o dito estudio ya ha puyau d’o centenar d’enqüestas feitas y os promotors esperan que se’n faiga muitas más, pues a finalidat ye arribar a o numero mas gran posible de miembros d’a comunidat aragonesofona pa tener una imachen adequada d’a situación d’a luenga en o mundo dichital. Asinas, en una primera furnada, o estudio se ye publicitando por os retz socials como Facebook u Twitter, y dimpués pasará a ninviar-se a asociacions y entidatz locals como concellos y comarcas.

Por agora, dende o grupo TecLiAr se demanda a maxima difusión y publicidat d’ista enqüesta pa tener a millor radiografía posible d’os usuarios de l’aragonés en Internet: https://docs.google.com/forms/d/1DjxUwSfnKoV9xJvzmMDIrU3JvK_t_OqA36CigVsOw8U/viewform

Una rispuesta a Fan una enqüesta global sobre l’uso de l’aragonés en Internet

  1. Pingback: Fan una enqüesta global sobre l’uso de l’aragonés en Internet | Arredol | La Franja

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.