Felipe de Borbón chura o suyo cargo como rei espanyol

Felipe de Borbón ha churau o suyo cargo oficialment. Radida presencia d'o pueblo madrilenyo pa saludar a Felipe VI y bell incident con banderas republicanas

Felipe VI da o suyo discurso en o Congreso. Foto: Congreso d'os Diputaus

Felipe VI da o suyo discurso en o Congreso. Foto: Congreso d’os Diputaus

A las 0:00 horas de hue, o Boletín Oficial d’o Estau ha publicau a lei organica que oficializaba l’abdicación d’o rei Juan Carlos I, y por tanto, a proclamación de Felipe de Borbón como nuevo rei d’Espanya.

A las 9:30 h. en o Palacio d’a Zarzuela, o rei Juan Carlos ha imposau a banda de capitán cheneral d’o exercito espanyol a o suyo fillo Felipe, y dende allí o nuevo rei ha saliu t’o Congreso d’os Diputaus.

En solemne ceremonia en o Congreso d’os Diputaus, Felipe de Borbón ha estau proclamau por as Cortz Chenerals espanyolas como rei d’Espanya con o nombre de Felipe VI, dimpués de churar o suyo cargo debant d’a Constitución espanyola y d’o president d’o Congreso d’os Diputaus. O nuevo rei ha vestiu de militar, tal como lo fació su pai, Juan Carlos I, y como yera costumbre en o dictador Francisco Franco.

En un hemiciclo reformau pa la ocasión, en que se trobaba toda mena d’autoridatz estatals, encara que garra chefe d’estau extranchero, Felipe VI ha realizau un discurso en que ha feito referencia a su pai, destacando que “logró superar diferencias que pareixeba insalvables” dimpués d’estar proclamau rei en morir Franco.

Asinas mesmo i ha feito referencia a la “unión d’Espanya“, unión que “no significa uniformidat“, recalcando que “i cullen totz“, apelando a la “diversidat cultural” en o Estau espanyol. As luengas cooficials d’o Estau espanyol han estau nombradas considerando que “forman un patrimonio común que be d’estar obchecto d’especial respecto y protección“.

Felipe de Borbón ha recalcau que “a monarquía parlamentaria puede y debe seguir realizando un servicio fundamental pa Espanya“, insistindo en a ufierta de “una monarquía renovada pa un tiempo nuevo“. Tamién ha quiesto referir-se a la situación de crisi economica resaltando a suya “cercanía a totz os ciudadanos a os que o rigor d’a crisi ha trucau“, presentando-se amás como un rei que puede ufrir “transparencia” y “eixemplaridat”.

Felipe VI ha rematau o suyo discurso despedindo-se en castellano, euskera, gallego y catalán, xublidando-se d’atras luengas como l’aragonés u l’asturiano que encara no son oficials.

Madrit vuedo y blindau

Madrit amaneixeba blindada por a policía espanyola, que ha desplegau mesmo mas d’una centena de francotiradors en os tellaus d’os edificios d’as carreras do pasaba a comitiva reyal. Manimenos, a presencia d’o pueblo madrilenyo ha estau muit radida en un recorriu que quasi pareixeba pantasmal. Muitos controls de seguridat en as carreras y periodistas sin poder acceder-ie debiu a las dificultatz pa acreditar-se.

Banderas republicanas viedadas

A policía espanyola teneba estrictas ordens d’empachar que s’amuestren banderas republicanas u qualsiquier atro simbolo antimonarquico. De feito, tres personas han estau detenidas acusadas de desobediencia y resistencia a l’autoridat en a carrera Montera, do un grupo d’unas 300 personas se manifestaba en defensa d’a republica. Unatra persona d’abanzada edat ha estau detenida por chilar “Viva a republica!” mientres pasaba a comitiva reyal. Os incidents mientres o recorriu han estau continos y bella persona mas ha estau retenida por expresar a suya preferencia republicana con chilos u con banderas.

En a redacción d’ElDiario.es a policía espanyola ha entrau en veyer penchada d’una d’as suyas finestras una bandera republicana y l’ha feita retirar. Seguntes o periodista Íñigo S. Ugarte, s’ha comentau a la policía que “se tractaba d’un cenyo simbolico que ye protechiu por a Constitución“. Manimenos, un policía les ha dito que “hue no yera o día pa ixe cenyo”, a lo que Ugarte ha respondiu “no vaiga por astí que va a ficar-se en un enredo”. Posteriorment, a despedida ha estau cordial.

Protestas convocadas arredol d’o Estau espanyol de tardes

Diversas protestas son convocadas en tot o Estau espanyol en contra d’a monarquía y a favor de que o pueblo decida o modelo d’Estau. En Aragón as convocatorias son en Zaragoza a las 20 h. en Pza. Espanya, en Uesca s’ha convocau a las 20 h. en Pza. Nabarra y en Teruel tamién a las 20 h. en a Pza. d’o Mercau (Domingo Gascón).

Asinas mesmo, as organizacions de l’independentismo aragonés Purna y Puyalón de Cuchas reclamarán de traza conchunta en as diversas movilizacions previstas hue en Aragón a Republica Aragonesacomo cauz fundamental que permita desenrrollar as demandas democraticas d’o pueblo aragonés“.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.