Fendo orella enguera as chornadas de prochectos de comunicación en luengas minorizatas

Fendo Orella: "Siempre hemos creyiu que l'aragonés no ye una cosa ta tener-la alzada en l'almario"

Charrada

A charrada de Fendo Orella

Fendo Orella, o programa de raso en aragonés d’a emisora libre Radio Topo se presentó iste chueves en as Chornadas de Prochectos de comunicación de luengas minorizatas que ha organizau en Zaragoza A Enrestida.

A charrada estió introducida por “Marshall”, una d’as personas que más tiempo leva treballando en a debandita emisora, qui fació un breu repaso d’a historia d’ista radio libre y d’a presencia de l’aragonés en ista mena de meyos. Asinas remeró como o programa “La cañería” que menaban Ecologistas en Acción, ya fació beluna d’as emisions suyas en aragonés. Dende atras radios plegarían “O mirallo” y “Mosica y parolas” , por eixemplo, pioners en a comunicación radiofonica en aragonés, asinas como as seccions en aragonés en bells programas.

“L’actitut debant de l’aragonés ha cambiau muito en as zaguers vinte anyadas que leva emitindo Radio Topo” esfendió Marshall. Recontó como en primeras bi heba minusvaloración ent’a luenga y mesmo en bell inte beluns se’n feban a mofla. Manimenos a situación ha cambiau y meteba como eixemplo l’evento de “D’estrela a estrela” a on que, en a zaguer edición, colabororon personas de 17 programas de radio diferents, “impensable dica fa no guaire”.

Dabi Anquela, un d’os dos fundadors d’o programa fa nueu anyadas, prenió o relevo. “Dende o prencipio hemos creyiu que l’aragonés no ye una cosa ta tener-la alzada en l’almario“, prencipiaba. En o programa, que concebiban como un magacine, siempre i son estadas representadas luitas de toda mena y s’ha prebau de charrar de qualsiquier tema. Dabi lo resumiba en un d’os lemas que ha teniu Fendo Orella: “Todas as luitas que cullen en una luenga”.

Continó con un repaso de belunas d’as millors anecdotas que han teniu en tot iste tiempo. Y ye que, como remera, “no somos profesionals, pero prebamos de fer-lo lo millor que podemos”. A suya luita por l’aragonés “ye deixando una simient en Radio Topo. Agora bi ha cartels bilingües, falcas, …”.

Ruben Santarromana continó charrando d’a segunda puenda d’o programa, quan plegoron ell y atras voces nuevas. Un total de ueito personas, contando colaboradors, que han feito parti d’o programa. En ista segunda puenda, o programa s’ubrió as nuevas tecnolochías, enguerando o mail, o blog y puyando os programas gravaus t’o podcast. “Isto permite ascuitar-lo quan y a on que quieras. Y a nusatros saber qué numer de descargas bi ha”. Ta Ruben, a luenga no ye estada una muga: “Siempre hemos charrau en aragonés sin problemas. Con qui hemos quiesto charrar, hemos puesto. Hemos charrau con chent de Catalunya, Asturias, Galicia y mesmo d’Andalucía y Latinoamerica y no bi ha habiu garra problema”.

Cuanto a fer o programa de traza voluntaria y en una radio libre, Ruben esfiende as suyas avantallas: “Somos muito conscients d’as nuestras limitacions comunicativas. Dengún no ye periodista. D’as errors que imos tenendo, imos aprendendo. Nos fa goi d’entivocar-nos porque sabes que no bi ha un chefe dezaga que te va a carranyar. Ixo da una comunicación más natural. Decimos as cosas como nos salen.”

Antis de dar paso a las preguntas d’os asistents, Ruben sentenciaba: “Por o feito de que l’aragonés siga condenau a muerte, o feito de fer-la servir ye un cenyo de rebeldía”.

Puetz ascuitar a charrada en os vinclos que bi ha contino:

Charrada Fendo Orella Parte 1

Charrada Fendo Orella Parte 2

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.