Fendo Orella participará en a maratón por as R.R.L.L. asturianas

O maratón ye iste cabo de semana, más de 42 horas d'emisión entre os días 20 y 22 chinero. Fendo Orella s'emitirá lo domingo de 15 a 16 horas y podrá ascuitar-se a traviés d'internet.

Fendo Orella, o programa en aragonés de Radio Topo (101.8 fm, Zaragoza) participará iste cabo de semana en o Maratón de Radios Libres de más de 42 horas que ye parando a Coordinadora de Radios Llibres d’Asturies

Iste maratón surte como rispuesta a las cartas que a Inspección Provincial de Telecomunicacións ha feito plegar a las comunidatz de vecíns an que se troban tres radios libres: Kras, Sele y QK. En ditas cartas se demanda que s’identifique a os propietarios de l’emisor baixo pinyora de mesmo 500.000€. A Coordinadora de Radios Llibres d’Asturies ya respondió enta ista enrestida con movilizacións, concentrando-se o pasau viernes 13 en Ovieu debant d’a Dirección Cheneral de Comunicacións.

“Nos n’enteremos [d’o Maratón] por os vinclos que existen entre as Radios Libres. Nusatros femos parte de Radio Topo, un prochecto de comunicación alternativa que naixió fa 18 anyos. Precisament a traviés d’a comunicación alternativa ye como sabiemos d’as enrestidas enta Radio Kras, Radio Sele y Radio QK; y d’as movilizacions que dende a Coordinadora de Radios Llibres d’Asturies se son organizando, entre ellas o Maratón” han recentau os miembros de Fendo Orella a Arredol.

Sobre a situación d’as Radios Libres en Aragón, dende Fendo Orella creyen que a situación ye muit favorable “cada vegada en somos más” apuntan, y ye que a las historicas Radio La Granja, Radio Topo y Radio Mai, en os zaguers anyos se’n han adhibiu atras tres como Radio Chicharra en Teruel, Radio Espiritrompa en Samianigo y Radio Chabolo, que emite dende tasament fa un par de meses dende o vico de Torrero de Zaragoza. “Ye muit important l’aparixión d’istas nuevas radios, y sinyalero que dos d’as tres sigan de dillá d’as mugas de Zaragoza”. Radio Topo, Radio La Granja, Radio Mai, Radio Chicharra y Radio Espiritrompa son arrocladas en a FARL (Federación Aragonesa de Radios Libres)

Pero lo programa de refirme a las R.R.L.L. asturianas que s’emitirá iste chueves dende Radio Topo (101.8 fm Zaragoza) de 18 a 19, y que se reemitirá o domingo de 15 a 16 en Asturias; no ye o primer programa que Fendo Orella fa con tematica asturiana, “hemos teniu a suerte d’entrevistar a un historico d’a mosica asturiana como Xune Elipe, cantaire de Dixebra, y gosamos sentir collas como os propios Dixebra, Soncai System u Skama la rede.” A más, en 2010, con motivo d’o seiseno cabo d’anyo d’o programa fación una entrevista a la Xunta pola Defensa de la Llingua Asturiana. “Ye un país [Asturias] que nos miramos con simpatía, i veyemos prous paralelismos con Aragón, tocants a la luenga y a la situación politica y social.” Por ixo, a la chent que siente á ormino Fendo Orella no se le ferá rarizo que as primeras parolas d’o programa d’iste chueves sigan en ixa luenga chirmana de l’aragonés: l’asturiano.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.