Fernández Díaz admite l’uso de balas de goma en os feitos de Ceuta

Diz que a Guardia Civil disparó ta l'augua con caracter 'disuasivo'. Campanya contra as deportacions d'internos d'os centros d'extranchers

Imachen d'una parte d'a cleta fronteriza en Ceuta. Foto: Xemenendura (C-BY-SA)

Imachen d’una parte d’a cleta fronteriza en Ceuta. Foto: Xemenendura (C-BY-SA)

O ministro de l’Interior, Jorge Fernández Díaz, ha admitiu que a Guardia Civil disparó balas de goma contra os immigrants que prebaban d’entrar nadando t’o estau por Ceuta, a on morioron no menos d’once afogaus. Seguntes o ministro, que ha compareixiu en o congreso ta dar-ne explicacions, os achents facioron un uso ‘proporcionau’ y ‘disuasivo’ d’o material antidisturbios y no causoron dreitament a muerte d’os immigrants.

Seguntes o ministro, totz ells morioron por afogamiento y dengún no presentaba signos de violencia, y isto descarta que as muertes sían dreitament vinculadas a l’uso d’o material antidisturbios.

Fernández Díaz ha desgranau l’informe elaborau por a mesma Guardia Civil an que s’explica a versión policiaca d’os feitos d’o pasau chueves, quan un grupo d’amán de 200 personas proboron de plegar ta Ceuta travesando a cleta d’a placha d’o Tarajal. Como que no se saliban, un grupo miró de plegar-ie nadando por o marguin d’o espigón. Quince personas morioron, y os supervivients que plegoron en a placha denuncioron que os achents d’a Guardia Civil les heban disparau balas de goma y bombas de fumo mientres yeran dentro de l’augua.

A Guardia Civil chustificó l’uso de material antidisturbios atribuindo una actitut ‘violenta’ a os immigrants. En vista d’o lurte de criticas, espardió un vidio prebatorio. Pero as imachens no amuestran ni como plegoron os immigrants t’o mar, ni cómo se i morioron ni cómo actuó a Guardia Civil. Se i veye una colla de chent, con luz de diya y en a placha, como lanza piedras ent’a zona espanyola d’a cleta, pero no se deduz qué pasó, de nueitz, en o mar. Qui sobrevivioron admitioron que beluns heban aventau piedras, pero que estió de rabia, dimpués d’a trachedia, quan habioron de quitar os muertos de l’augua.

L’actuación policiaca ya ha estau denunciada por una vintena d’ONG y s’ha ubierto una investigación d’oficio. Pero o gubierno espanyol ha esfendiu a os achents en tot momento y a Guardia Civil mesmo ha menazau a qui ‘difamen’ dicindo que se querellará.

Amás seguntes a versión oficial, garra immigrant no entró en territorio d’o estau espanyol, pero un vidio gravau por un ciudadano dende casa suya amuestra como uns quántos plegoron dica a placha, a on a Guardia Civil los pilló y los fació tornar enta Marruecos, sin ubrir garra expedient d’expulsión ni seguir o procedimiento d’a lei d’extranchería.

Human Right Watch ha denunciau as expulsions sumarias d’immigrants que entran en Melilla y as agresions que paten. Expulsions que, recuerda, ‘contravienen a normativa internacional y d’a Unión Europea, que vieda en os países de fer tornar personas a la fuerza enta territorios a on s’exposan a un risque de tracto inhumano u degradant‘.

Unatro interrogant encara ubierto ye a cantidat de chent que morió aquella nueit. Oficialment, s’ha confirmau a muerte de diez personas; fuents d’a Guardia Civil y a delegación d’o Gubierno espanyol en Ceuta elevan a cifra a quince; y as ONG tienen miedo que no’n sigan mas.

Campanya contra os ‘vuelos d’a vergüenya’

O gubierno espanyol no solament ye en o suyo punto de gollada por a vulneración de dreitos humanos en a cleta ceutí, sino tamién por o funcionamiento d’os centros d’internamiento d’extranchers (CIE). A campanya ta que se zarren os CIE alerta que hue decenas de personas engarcholadas en CIE’s entre iste zaguer tiempo serán deportadas enta Senegal y Marruecos en os clamaus ‘vuelos d’a vergüenya’. Istos vuelos, informa a campanya, son una vulneración d’os dreitos humanos. Por ixo se fa un clamamiento a boicotiar Air Europa, que ye a companyía aeria adchudicataria d’o contracto ta fer istos viaches.

Dende que s’adchudicó o contracto, en aviento, ya i ha habiu uns quatro vuelos –d’avions con capacidat dica docientos pasachers– ta deportar extranchers ta Marruecos, un ta Equador y dos mas ta Nigeria. A campanya critica que o Gubierno espanyol pague cada anyo 12 millons d’euros a Air Europa ta istos vuelos de deportación, ‘emplius gracias a escardas policials racistas’.

Seguntes Tanquem els CIE, en un d’istos vuelos –que se fan cada dos meses– partirán decenas de personas de nacionalidat senegalesa ‘que han estau victimas d’as escardas racistas istas zagueras semanas’. L’atro vuelo trahierá marroquís enta Jerez de la Frontera, an que serán conducius con autocar dica Algeciras y allá con ferry dica Ceuta: ‘En a mesma buega a on i habió a represión salvache fa uns diyas, os policías espanyols entregarán os deportaus a la policía marroquí’.

A campanya denuncia istos desplazamientos forzaus masivos y alerta que son ilegals y que, encara que se recurra a tecnicismos burocraticos ta chustificar-los, embrecan una vulneración d’os dreitos humanos.

Fuent: http://www.vilaweb.cat/noticia/4173108/20140213/fernandez-diaz-admet-lus-bales-goma-fets-ceuta.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.