Festival Matarranya Íntim: Teatro a domicilio pa la dinamización y fer valorar a Comarca

Iste festival se realizará en Rafals o cabo de semana d'o 3 y 4 d'agosto con a intención de dinamizar o territorio matarranyenco

Matarranya-Íntim-Foto-del-equipo-y-los-asistentes-en-Valderroures-rec-300x225

Equipo y asistents d’o festival. Foto: Matarranya Íntim

“Centrau en un amplo abanico de proposas scenicas multidisciplinars, o Festival Matarranya Íntim desplega iste verano as suyas velas con una atractiva programación pa totz os publicos que chipiará os fogars d’a localidat historica de Rafals os días 3 y 4 d’agosto”. Asinas lo desveló iste mierques a organización en rueda de prensa, evento que se celebró en o Salón de Plenos d’a comarca d’o Matarranya y en La Fonda La Plaza de Val de Robres.

Francisco Esteve, o President d’a comarca, estió o primer en subrayar a importancia de celebrar un festival de caracteristicas tant innovadoras en a comarca, de vez que enfatizó a importancia de l’arte en a dinamización de qualsiquier territorio. Como President, Esteve desveló que “a ideya de l’equipo d’organización ye que o festival sía un evento itinerant que amane as artes scenicas de vanguardia a un lugar diferent cada anyo”.

David Arrufat, o Tecnico de Cultura d’a comarca, adhibió que con ista iniciativa se pretende de contribuir en a dinamización y en fer valorar as localidatz y espacios paisachisticos d’a zona, de vez que “ufrir a o publico una ufierta cultural de calidat, diferent a o que somos feitos”. En zaguerías sinyaló que “Matarranya Íntim ye sin dubda, a primer experiencia de teatro intimo en Aragón, con o que a comarca se posiciona en o panorama scenico”.

Antiparte, José Luís Roda, Consellero Comarcal y Concellero d’o Concello de Rafals, recalcó a importancia d’a cultura como mecanismo de salida de l’actual crisi. Roda afirmó que “cal defender o mundo d’a cultura y d’o espectaclo y vista a marabillosa acullida que ha teniu entre os habitants d’o lugar, asperamos que o festival tienga un futuro y perdure con os anyos”.

Microespectaclos d’entre 20 y 30 minutos de duración que se repetirán qualques vegadas mientres o día y que cubrirán multiplas disciplinas artisticas. A danza-teatro, o teatro d’obchectos y d’humor, a poesía scenica, o teatro infantil, os cuentos pa adultos y a mosica en directo invadirán as carreras, plazas, camins y arboleras d’a localidat de Rafals.

Por a suya parte, Jacobo Julio, Codirector d’o festival afirmó levar en o corazón a la comarca, a o lugar de Rafals, a os suyos paisaches y a os suyos habitants. De feito, dende que lo descubrió fa 8 anyos, adquirió y reconstruyó una d’as casas d’o lugar; Casa Juano, que será a primera en ubrir as suyas puertas a o publico. Julio sinyaló que “Matarranya Íntim no ye solament teatro, sino tamién patrimonio y lugar. As y os espectadors podrán almirar l’entorno y desfrutar d’o paisache y d’a naturaleza en un mesmo cabo de semana”.

A rueda de prensa contó tamién con a participación de Pepa Cases; coreografa, bailarina, cantant y Directora d’a Companyía “A Tempo Dansa”, que presentará ‘Enviudada o lo prometido es deuda’, una pieza de danza-teatro creyada ex profeso pa lo festival a modo de reflexión sobre as valors y as promesas d’una muller azotada por a tristura d’a recient muerte d’o suyo hombre.

A coreografa enfatizó a important labor de dinamización cultural d’o festival y comentó que ya participó en una d’as edicions de Cabanyal Íntim, o suyo homonimo en Valencia, y que os resultaus estioron mas que satisfactorios, tanto a livel artistico como humano.

Dimpués d’a presentación d’a programación, a rueda de prensa se desplazó a la Fonda La Plaza pa deixar paso a o socalce scenico que teneba presta a organización. A bailarina Pepa Cases sorprendió a las y os asistents con a suya sinuosa, enerchica y marabillosa danza entre as mesas, siellas y racons d’a Fonda. Isto como chicot abance d’o que será a suya pieza completa entre o festival.

Una programación eclectica y orichinal

Esther Melo, responsable de Comunicación d’o Festival, explora y anuncia o conteniu artistico de Matarranya Íntim. O teatro contemporanio vendrá representau por a Cía. Maquinant Teatre y o suyo espectaclo ‘El día que cambié mí casa por una trompeta de colores’, una pieza de micro-teatro en castellano que plasma a realidat de tres chirmanas que son amanadas a estar desafiuciadas.

En ista 1ª Edición d’o Festival, o teatro d’obchectos y d’humor surtirá d’a man d’a Cía. La Panda de Yolanda, que con o suyo inchenioso montache ‘Üiqü’is’, presentará una experiencia teatral basada en sketches d’a humor mas absurda y surrealista. A pieza combina diferents tecnicas de manipulación que amanan a o publico a un teatro basau en a sencillez y en a imachinación, tot realizau con materials reciclaus y acompanyau de mosica, cuerpo y interpretación.

‘El carrusel de los niños perdidos’ ye o nombre d’a pieza de poesía scenica que nos ofreixe Colectivo Piel.  Un espectaclo que transporta a os espectadors a l’universo machico d’os ninos, un espacio d’inocencia an que a imachinación creya as temors que habitan o corazón en prebar d’amar a o prochimo.

En zaguerías, a Cía. Almudena Francés será doblement representada en Matarranya Íntim. Por un costau, deleitará con os suyos cuentos pa adultos en valenciano, ‘Això no passa…no passa ni poc’, una mirada antropolochica a las historias d’o día a día, y por atro costau, será a encargada de cubrir o espacio pa lo teatro infantil con ‘La caseta de Anacleta’, una divertida pieza pa las y los mas chicotz que dispertará totz os suyos sentius.

Chunto a la programación oficial, o Festival Matarranya Íntim s’ixampla y complementa con o espacio nocturno Íntim a la Nit, una proposa gratuita mosical que amenizará y prolargará a nueit d’o sabado. O colectivo trigau pa ista 1ª Edición son Luna y panorama de los insectos, que o suyo treballo combina a mosica y a poesía scenica, ufrirá una scena brenca convencional. O concierto tendrá puesto en o Molí de L’Hereu o sabado 3 d’agosto a las 23.00 horas.

Fuent: http://arainfo.org/2013/07/festival-matarranya-intim-teatro-a-domicilio-para-la-dinamizacion-y-la-puesta-en-valor-de-la-comarca/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.