Francisco I, o primer papa chesuita

O suyo posible papel como colaboracionista en a dictadura militar archentina, o punto negro destacable

Francho IJorge Mario Bergoglio ye o nuevo Papa d’a Ilesia Catolica. O cardenal, naixiu de Buenos Aires o 17 d’aviento de 1936, ha estau trigau pontifice iste miercols de tardes dimpués de dos días de conclave y cinco votacions por parte d’os 115 cardenals que se zarroron o lunes en a Capiella Sixtina ta trobar o sucesor de Benedet XVI. Jorge Mario Bergoglio, que ha trigau o nombre de Francisco como papa, se convierte a os suyos 76 anyos en o primer pontifice latinoamericano d’a historia. Y tamién en o primer papa chesuita.

Bergoglio, que no yera entre os prencipals papables, ye tamién o primer Papa chesuita d’a historia d’a Ilesia. A chaminera d’a Capiella Sixtina de Sant Pero d’o Vaticano ha exhalau o fumo blanco pocos minutos dimpués d’as siet d’a tarde, tornando barrenaus a os millars de fidels que dende iste lunes son congregaus en a plaza ta saludar a o sucesor de Joseph Ratzinger, Benedet XVI.

Jorge Mario Bergoglio (Buenos Aires, 1936) ha saliu t’a balconada dimpués de mas d’una hora d’estar trigau, ya vestiu de pontifice. Bergoglio ha esleixiu o nombre de Francisco ta denominar-se como Papa. Bergoglio esdeviene en o 266º pontifice d’a Ilesia Catolica en un tiempo de fuerte crisi y dificultatz.

Pontífice moderau y reformista

Bergoglio, visto como un cardenal moderau y progresista en un contexto muit conservador, ye tamién afín a las reformas aintro d’a Ilesia. O nuevo papa, manimenos, no yera entre os que se creyeba que teneban mas posibilidatz de salir esleixius y de feito tasament se i heba presto cuenta. Y tampoco no cumple un d’os supuestos que se daba por feito: que o nuevo Papa sería choven. O Papa Francisco I tien 76 anyos y ye o mas gran d’a mayoría de posibles candidatos.

O primer Papa chesuita

Bergoglio ye o primer Papa chesuita d’a historia d’a Ilesia. Fillo d’un matrimonio d’italianos, estió proclamau cardenal presbitero de Santo Roberto Belarmino o 21 de febrero de 2001 y estió president d’a Conferencia Episcopal archentina entre dos periodos.

A os 21 anyos prenió a decisión de convertir-se en mosén y ingresó en un seminario ya en a orden chesuita y estió ordinau mosén o 13 d’aviento de 1969. Ta par d’alavez fació una larga carrera que no se veyó trencada ni por a dictadura archentina, mientres a quala continó progresando. O 20 de mayo de 1992 estió consagrau bispe titular d’Auca ta exercer como un d’os quatro bispes auxiliars de Buenos Aires.

Ya o 3 de chunio d’o 1997 estió designau bispe caodchutor en l’archidiocesi de Buenos Aires y prenió o cargo d’arcebispe de Buenos Aires o 28 de febrero de 1998. O 21 de febrero de 2001 Chuan Pavlo II lo fació cardenal d’o titol de Santo Roberto Belarmino.

O suyo papel en a dictadura, posible punto negro en a suya biografía

O papel que Bergoglio tenió mientres a dictadura militar archentina podría estar un punto negro en a suya biografía. Ell ha negau as acusacions de colaboracionista con a dictadura, pero en cambeo bells meyos archentinos progresistas y bells testigos replegaus por istos mesmos meyos l’acusan de fa tiempo d’haber aduyau a o rechimen y mesmo d’haber participau en a desaparición de bells mosens seqüestraus. Un d’istos meyos ye o diario Página 12, a web d’o qual s’ha colapsau ista nueit.

Fuent: http://www.vilaweb.cat/noticia/4094871/20130313/francesc-primer-papa-jesuita.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.