Francia achustará a entre 60.000 y 150.000 profesors

Se ye tramitando una reforma d'as leis educativas. O presupuesto d'os ministerios d'Educación y Interior son os unicos que puyan os suyos presupuestos

Vincent Peillon, ministro d'Educación (Foto: Wikipedia)

Vincent Peillon, ministro d’Educación (Foto: Wikipedia)

François Hollande ha dito muitas vegadas que as grans prioridatz politicas d’a suya presidencia son os chovens y a educación y preba de prencipiar a fer-lo. O Consello de Ministros celebrau iste miercols aprebó o prochecto de lei t’a Refundación d’a Escuela Republicana, que “preba d’aturar o empioramiento d’a educación publica dimpués d’una decada de gubiernos neoliberals que achiquioron o numer de profesors y d’horas lectivas ta favoreixer a l’amostranza privada”.

A reforma, que ye estada alcordada con pais y profesors por o ministro d’Educación Vincent Peillon, alportará a o sistema publico 60.000 profesors y funcionarios en cinco anyadas (54.000 en a escuela y 6.000 en l’amostranza superior y agricola). A mida preba de compensar a perda de 80.000 puestos sufrida mientres as cinco anyadas de gubierno de Nicolas Sarkozy, quan l’Executivo aplicaba estrictament a norma de sustituyir nomás un de cada dos chubilaus.

En realidat, a estimación oficial aforma que a cifra total d’incorporacions nuevas t’o sistema educativo publico plegará dica as 150.000 personas, ya que os profesors que cubrirán a los docents que accedan t’a pensión treballarán a tiempo parcial as dos primers anyadas.

Hollande s’ha comprometiu a achiquir en 60.000 millons d’euros o gasto publico en cinco anyadas, pero ha deixau a la escuela publica difuera d’o plan. A inversión en Educación ta 2013, que supera os 62.000 millons, ye a unica partida estatal, chunto con Interior, que creix respecto a 2012.

O ministro Peillon remera que, por cada profesor nuevo, l’Administración “perderá un funcionario”, pero o coste d’a reforma encara no se conoix. Un portavoz d’o ministerio dició a Noticies Sirius que a memoria economica no ye rematada, encara que se previye que distribuirá os recursos de traza diferent ta privilechiar a la primaria y la infantil, que son “as gran prioridatz”.

Con un gasto publico en educación por alumno una mica superior a la meya europea en 2009 (pero bell poco por debaixo en as etapas d’infantil y primaria), os organismos que miden a calidat de l’amostranza, como a OCDE, cada vegada meten a Francia más baixo, y remeran que o problema basico ye una organización d’o tiempo penible, más que más en primaria: seis horas diyarias, repartidas dende 2008 en quatre diyas a la semana, lo que fa 144 diyas de clase cada anyada contra os 180 /200 diyas de países parellanos.

A tamás d’o consenso en o diagnostico, y encara que a reforma nomás planteya recuperar 45 minutos semanal tornando a fer meya chornada de clase os miercols, os sindicatos de profesors han refusau a futura lei con dos diyas de vadas que s’han seguiu de traza masiva.

A filosofía d’o cambio pende, seguntes o ministro Peillon, en “construyir a escuela d’o futuro, una escuela chusta ta totz y exichent con cadagún“, y os suyos obchetivos son “puyar o ran de conoiximientos, competencias y cultura de l’alumnalla, achiquir as desigualdatz socials y territorials y baixar as cifras d’albandono escolar”.

Fuent: http://noticies.sirius.cat/2013/01/franca-contractara-entre-60000-i-150000.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.