Francia contina en piet de guerra contra a Lei d’o Treballo

Un millón de personas salioron ahiere t'a carrera en París contra a Lei d'o Treballo. A manifestación se saldó con 40 nafradas y 58 detenidas solo en París

Gases lacrimochenos mientres a manifestación en París o 14 de chunyo. Foto: NUIT DEBOUT (CC-BY-SA)

Gases lacrimochenos mientres a manifestación en París o 14 de chunyo. Foto: NUIT DEBOUT (CC-BY-SA)

Fuerte movilización en Francia contra o prochecto de reforma laboral d’o Gubierno socialista. Seguntes as organizacions sindicals FO, CGT y Solidaires, mas d’un millón de personas desfiloron ahiere, 14 de chunyo, en a capital francesa (1,3 millons en tot o país), un numero superior a o d’as precedents manifestacions d’o 9 y d’o 31 de marzo, que tamién estioron multitudinarias. Tamién se producioron movilizacions en Marsiella, Tolosa, Rennes y León d’o Roine, entre atras ciudatz.

En París, a manifestación fue rapidament saturada de gas lacrimocheno mientres un recorriu de mas de cinco kilometros, y os antidisturbios tamién facioron uso de canyons d’augua. Se rechistroron incidents con a policía en quantos puntos d’a marcha. Mientres que un grupo entonaba o Bella Ciao, quantos manifestants facioron cara a las fuerzas de seguridat a o chilo de “París, en piet, rebela-te!” u “tot o mundo odia a la policía”. Os enfrontinamientos deixoron a lo menos 40 ferius en a capital, entre manifestants y policías, y 58 personas detenidas. Atras 15 personas fuoron detenidas en diversas manifestacions en a resta d’o estau.

En paralelo a las manifestacions, as vagas continan en a empresa publica ferroviaria SNCF, asinas como en Air France, o que ha obligau a l’aerolinia a cancelar mas de mil vuelos.

Os sindicatos han alvertiu que ista movilización no va a estar a zaguera.

Fa ya mas de tres meses que s’inicioron as movilizacions contra a Lei d’o Treballo, que derivoron igualment en a ocupación d’as plazas a traviés d’o movimiento Nuit Debout. A pesar d’a fuerte oposición a la norma –un 74% d’os franceses, seguntes as zagueras enqüestas–, o Gubierno recurrió o 10 de mayo a l’articlo 49.3 d’a Constitución ta aprebar o prochecto de lei por decreto, sin debat y sin votación en o Parlamento. Entre o 13 y o 24 de chunyo, a normativa pasa o suyo zaguer tramite en o Senau. Iste prochecto de lei imposa mas flexibilidat y reduz os costes laborals. L’articlo 2, o mas polemico, concentra particularment todas as criticas. En efecto, o texto mete as negociacions empresarials por alto d’os convenios colectivos, o que permite aprebar rebaixas d’as condicions laborals.

Qualques observadors, incluiu o periodico francés Mediapart, que dedica un articlo ista semana sobre iste afer, consideran ista modificación d’o codigo laboral como dreitament inspirada por as recomendacions d’o Consello Europeu ta reducir o deficit francés. I hai qui recorda l’alvertencia de l’antigo ministro d’Economía griego charrando d’un plan amagau d’o ministro alemán Wolgang Schäuble: “Grecia no ye cosa mas que una preba. O verdadero obchectivo d’o doctor Schäuble ye Italia y Francia, o Estau d’o bienestar francés, o suyo dreito laboral y as suyas empresas nacionals”.

Articlo orichinal de Franck Richard ta Diagonal.

Fuent: https://www.diagonalperiodico.net/global/30684-francia-sigue-pie-guerra-contra-la-ley-del-trabajo.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.