Francia declara ilegals dos leis polinesias porque o debat parlamentario se fació en tahitiano

O Consello d'Estau argumenta que o francés ye a unica luenga oficial d'as institucions. O partiu independentista UPLD califica a decisión de "actitut neocolonial"

conseil-etat

Foto: Consello d’Estau francés

Dos «lois de pays» (leis aprebadas por l’Asamblea d’a Polinesia Francesa) han estau declaradas ilegals por o Consello d’Estau francés porque una sesión de l’Asamblea se fació en a luenga local, o tahitiano. O Consello diz que o primer vicepresident d’a Polinesia y bells diputaus facioron servir o tahitiano mientres o debat d’as leis, que s’apreboron en 2012 y que se referiban a las pensions d’os treballadors.

O Consello d’Estau argumenta que l’Estatuto d’a Polinesia Francesa deixa claro que o francés ye a unica luenga oficial d’o territorio. Asinas, no charrar en francés en sesión parlamentaria puede «meter estorbaduras a l’exercicio d’o control d’a legalidat d’os textos aprebaus», diz o Consello.

L’articlo 57 de l’Estatuto diz que «o francés ye a luenga oficial d’a Polinesia Francesa» y que o suyo emplego ye obligau t’as «personas churidicas d’o dreito publico». O tahitiano ye reconoixiu oficialment como «elemento fundamental d’a identidat cultural», pero o suyo emplego nomás ye previsto ta personas churidicas privadas y t’os individuos. Tal como escribe l’articlo, as escuelas son a unica excepción, a on o tahitiano puede estar amostrau como materia.

O diario tahitiano As Nouvelles escribe que a decisión ye «inquietant», dau que en a camara s’ha instalau un sistema de traducción simultania d’o tahitiano a o francés. O diario diz que os diputaus charran habitualment en tahitiano y que as «mugas» de l’uso d’o tahitiano y d’o francés son «sutils». Unatra portalada informativa, Tahiti Infos, tamién considera que l’aplicación d’as leis por parte d’o Consello ye «muit estricta» en iste caso, dau que o tahitiano s’emplega regularment en l’Asamblea polinesia, dau que i hai disponible un sistema de traducción simultania.

O partiu independentista charra d’una «actitut neocolonial»

A Unión t’a Democracia (UPLD), prencipal partiu proindependentista polinesio, considera que o Consello d’Estau ha preso una «actitut neocolonial» contra a «identidat, historia y cultura» d’a Polinesia. L’UPLD diz que a decisión «demuestra» que a Polinesia ye «una colonia», y no «una autonomía», dau que «no tien autoridat ta fer servir a suya propia luenga en as suyas propias institucions».

Fuent: http://www.nationalia.cat/ca/noticies/1493

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.