Francia ratificará a Carta Europea d’as Luengas Minoritarias pero se viedará l’uso d’as luengas territorials en a vida publica

Pese l'aprebación, s'incluirá una declaracion interpretativa que mantiene o francés coma luenga d'a Republica. Niega os dreitos lingüisticos colectivos d'os parladors d’atras luengas

Foto: Richard Ying et Tangui Morlier (CC-BY-SA)

Foto: Richard Ying et Tangui Morlier (CC-BY-SA)

L’Asamblea estatal francesa aprebó ahiere de tardes ratificar a Carta Europea d’as Luengas Rechionals u Minoritarias con un voto prou claro: 316 diputaus votoron a favor y 149 en contra. Votoron 510 diputaus y a mayoría absoluta necesaria yera de 256 votes.

O Partiu Socialista votó mayoritariament a favor, 268 diputaus sostenioron a propuesta mientres que ueito votoron en contra. L’UMP votó mayoritariament en contra con 40 votos favorables, 130 votos contrarios y 40 abstencions. Cal remarcar que os diputaus de dreita que han sosteniu a ratificación d’a Carta son mas que mas de bretons y d’alsacians. Os tres diputaus d’extrema dreita votoron en contra. O centrista Jean Lassalle, que ye bearnés, votó a favor. O Frent de Cucha se trestalló con seis votos a favor y quatro en contra, encara que Mélenchon fació arribar una carta a os diputaus pa que votasen en contra. Finalment, os cinco diputaus d’as zonas d’ultramar votoron a favor.

Con ista mayoría absoluta, si se confirma dentro d’o Senau, o gubierno francés deberá de proposar un prochecto de lei constitucional que prenga os termins d’ista propuesta de lei, pa revisar a constitución francesa y pa que se ratifique a Carta. S’actuará introducindo un articlo 53-3 dimpués de l’articlo 53-2 que dirá que a Republica puede ratificar a Carta. Con tot y con ixo, aquell articlo será completau por una declaración interpretativa que mantiene a superioridat d’o francés, luenga d’uso obligatorio por l’administración y os servicios publicos. Ixa declaración niega tamién os dreitos colectivos d’os fablants.

Ista Carta ye destinada a protecher y promover l’uso d’as luengas mal denominadas rechionals dentro de totz os dominios humanos (educación, medias, servicios administrativos, etc.) y se proposó en 1992. D’os 47 estaus d’o Consello d’Europa, 33 la han sinyada y 25 la han ratificada. O estau francés la sinyó en 1999 pero nunca la ha ratificada porque o Consello Constitucional decidió en chunio de 1999 que a carta yera contraria a la igualdat de totz os ciudadanos y a l’articlo 2 d’a constitución francesa, que diz que “a luenga d’a Republica ye o francés”.

Cal remerar que en 1999 o primer ministro Lionel Jospin sinyó a Carta, pero o president d’alavez, Jacques Chirac, no la ratificó y empachó que Francia reconoixese os dreitos lingüisticos d’as suyas minorías. A ratificación d’a Carta estió una promesa electoral d’o president d’a Republica, François Hollande; y o suyo primer ministro, Jean-Marc Ayrault, lo prometió atra vegada en aviento pasau entre a crisi bretona d’as barretinas royas, vía deposito d’una propuesta de lei socialista pa revisar a constitución.

Fuent: http://www.jornalet.com/nova/2992/ratificaran-la-carta-mas-senebira-lusatge-de-las-lengas-territorialas-dins-la-vida-publica

Una rispuesta a Francia ratificará a Carta Europea d’as Luengas Minoritarias pero se viedará l’uso d’as luengas territorials en a vida publica

  1. Pingback: L’Estau francés ratifica a Carta Europea d’as Luengas Minoritarias pero niega os dreitos d’atras luengas | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.