Francia y R.U. reconoixen a o Consello Nac. Sirio como interlocutor

A ONU y a Liga Arabe nombran a Kofi Annan como ninviau especial conchunto en Siria en a tuca internacional ta decidir accions contra o rechimen.

Kofi Annan (Foto: wikipedia)

O ministro d’Afers Foranos francés, Alain Juppé, remeró ahiere en a tuca internacional ta decidir aicións contra o rechimen sirio que a UE conchelará o lunes os activos d’o Banco Central Sirio como parte d’o endurecimiento d’as sancións. Amás, declaró o Consello Nacional Sirio, prencipal organización d’oposición a o gubierno de Baixar al-Assad, ‘interlocutor lechitimo’ d’a comunidat internacional. O ministro d’Afers Foranos d’o Reino Uniu, William Hague, tamién ha decidiu reconoixer o CNS como ‘interlocutor lechitimo’. Iste mesmo proceso ye o que siguioron britanicos y franceses en Libia ta contribuir a derrocar o rechimen de Gaddafi.

 

Tuca internacional en Túnez ta decidir aicións contra o rechimen sirio

O grupo Amigos de Siria, empentau por a Liga Arabe y formau por una setentena de países y organizacións internacionals, se reunió ahiere en Túnez con l’obchectivo de pedir a o rechimen d’o president sirio, Baixar al-Assad, que ature en quaranta y ueito horas as ‘enrestidas en arias civils’, ta facilitar l’acceso humanitario en as zonas mas castigadas por o conflicto y permitir dentrar a las ciudatz que se troban mas asediadas y castigadas, como Homs, Deraa y Zabadani.

En o borrador d’a tuca d’Amigos de Siria, en que participan a Liga Arabe, a Organización d’a Conferencia Islamica, a Unión Europea y os Estaus Unius, pero ni Rusia ni China (prencipals valedors de Baixar al-Assad), s’esfiende un bloqueu en a venda d’armas en Siria, o embargo petrolero a o país y a reducción d’as relacións diplomaticas con Damasco.

O grupo, an tamién tienen voz os prencipals grupos opositoris sirios, se compromete de vez a reforzar as sancions ta presionar o rechimen sirio, con midas como a prohibición de viachar y a conchelación de biens.

 

Kofi Annan, ninviau especial

Paralelament, os secretaires chenerals d’as Nacions Unidas (ONU) y d’a Liga Arabe, Ban Ki Moon y Nabil Elaraby, respectivament, han nombrau a o ex-secretario cheneral d’a ONU, Kofi Annan, como ninviau especial conchunto en Siria. Annan ‘aportará as suyas buenas trazas de fer ta meter fin a toda a violencia y a violación de dreitos humans y promoverá una solución pacifica a la crisi siria’.

En un anyo de conflicto, qualques ONG calculan que han perdiu a vida en Siria mas de siet mil sietecientas personas.

Fuent: http://www.vilaweb.cat/noticia/3988855/20120225/franca-regne-unit-reconeixen-consell-nacional-siria-interlocutor-legitim.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.