Gallardón torna ta zaga en a lechislación de l’aborto y quiere fer penas perpetuas selectivas

Amás se ferá bosar os segundos recursos y se reformará a lei d'o menor

O ministro espanyol de Chusticia, Alberto Ruiz Gallardón, pretende tornar a establir o consentimiento paterno ta que as menors puedan abortar. Gallardón ha presentau as suyas propuestas en a primer comisión parlamentaria de chusticia an que ha estau present, dende o suyo anomenamiento. Gallardón ha dito que l’actual lei d’interrupción de l’embrazo estió aprebada sin de consenso. Seguntes Gallardón, se tracta de regular o que ha clamau “dreito a la vida”.

Atras midas que ha proposau Gallardón planteyan lechislar a pena de prisión “permanent” revisable en casos d’o que ha dito “alarma social”. O ministro ha parau cuenta de no dicir “perpetua”, una figura que podria estar mesmo inconstitucional. Amás, tamién ha anunciau que se reformará a lei d’o menor dimpués d’o caso mediatico de Marta del Castillo. Seguntes a reforma, os menors que faigan actos delictius con adultos seran chudgaus chunto con istos, aplicando a lechislación cheneral.

Unatra mida más, os ciudadans que recurran una sentencia en segunda instancia habrán de pagar taixas chudicials, ganen o pierdan o recurso. O ministro ha indicau que ye una forma de privar abusos en l’acceso a la Chusticia. Tamién ha planteyau que o Consello Cheneral d’o Poder Chudicial siga trigau por os propios chueces.

5 Rispuestas a Gallardón torna ta zaga en a lechislación de l’aborto y quiere fer penas perpetuas selectivas

  1. Sarsamarcuello

    Prau bien gallardón! fas prau bien con ixo d’as tasas… que luego te trobas os chudgaus toz plenos de esgarramantas y clases medias, a cascala!

    A oligarquía ye de subidón. se trata de construyir agora o nunca a Espanya soniada…

  2. Pos ixo, que ralentizar a Chusticia no siga de probes. Que nomás prescriban os delictos d’as adineradas chents de Dios.Con Franco viviban millor pero agora con Rajoy tamién van a vivir “de puta madre”.

  3. Tiengo una questión que risolver. Quizau ye qu’estoi entivocau pero creyeba que ARREDOL no teneba un rafe político determinau. Pos cal veyer como se fan as corónicas ta adonar-se que si.

    “Gallardón torna ta zaga…” ¿Qui torna ta zaga aquí? ¿Qui no reconoixe pas dreito a os no-natos como ditz a Constitución o qui esfiende a l’indefenso mayor que ye un nino que no ha naxiu encara? No trefuquemos os enfoques que mos quedaremos ciegos. Ye cierto que quasi 7 anyadas de zapaterismo deixa traza y mos costará muito remontar iste mal suenio.

    Os tiempos d’os acotoladors d’as libertatz han rematau. Tornan tiempos en os que a sociedat civil recobre de nuevas o suyo puesto en o suyo propio esdevenidero.

  4. No sé quál yera a intención d’o redactor u redactora, pero como que se ye decindo de tornar ta una lei semellant a l’anterior, no veigo que necesariament s’haiga a interpretar como tu dices. Se diz que Gallardón tornará enta l’anterior modelo lechislativo de l’aborto.
    Igual m’entivoco, manimenos, ya que o medio tamién tiene dreito a levar una linia editorial (y nusatros a compartir-la u no, y a leyer-lo u no).

  5. Y ye mas….
    Qui esfenderá a os pobres espermatozoides, que potencialment son ninos y ninas, y que tienen meya alma u alma entera, d’as sobatidas?
    Lechislación anti-sobatidas ya!

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.