Ganemos Zaragoza contina sumando chent en a quarta asambleya

A iniciativa municipalista preba d'arroclar a buena parte d'a cucha y os movimientos socials d'a ciudat ta formar una lista electoral que ganase as eleccions municipals

Reunión de Ganemos (Foto: La Enredadera)

Reunión de Ganemos (Foto: La Enredadera)

A iniciativa municipalista Ganemos en Zaragoza contina sumando chent dimpués de tres reunions, como se podió viyer ahiere en a que bi habió en a librería La Pantera Rossa, a on que quasi cient personas estioron debatindo mientres más de dos horas. Zaragoza se suma a atros lugars y ciudatz aragoneses a on que son surtindo iniciativas parellanas como Exeya, Alcanyiz, Uesca u Teruel.

En una primer parte, l’asambleya prebó de concretar a clamada “Fuella de ruta”, un calendario d’as cosas ta fer ta poder plegar con una lista electoral en as eleccions municipals y nacionals que se ferán, en primeras, o venient mes de mayo. Asinas, Ganemos pareixe que podría presentar-se (más) publicament antes d’as fiestas de Zaragoza, con una serie de propuestas programaticas chenerals de politica municipal.

En una segunda parte se debatioron aspectos más “internos” como a organización en collas más u menos grans y con más u menos quefers, u qué fer dimpués d’as eleccions y como controlar a faina d’os candidatos electos. Tamién se charró d’un posible futuro proceso de “primarias” y d’a posibilidat de que bells partius d’a cucha (se metió como eixemplo a IU) no se presentasen t’as eleccions municipals y refirmasen ista candidatura. Mientres toda l’asambleya se sintioron voces a-saber-lo criticas con a chestión municipal y con muitas propuestas de cambios fundos.

Dende as primers reunions, convocadas en primeras por “Movimiento por la Democracia”, o numer d’asistents ha iu creixendo china chana, pero de traza firme, lo que ha provocau ya problemas lochisticos ta trobar puestos a on que reunir-se. As reunions son ubiertas y publicas de tot y, de feito, tot l’audio de l’asambleya d’iste lunes se puede sentir en iste vinclo.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.