Garoña rematará a suya actividat de traza definitiva o venient domingo

Os responsables d'a central nucleyar de Burgos han comunicau a os suyos treballadors que en a meyanueit d'o venient domingo s'aturará a suya actividat

O president d’o Comité d’Interpresa ha precisau que les han indicau que en ixe momento s’encetará o proceso ta quitar d’o nuclio d’o reactor o combustible atomico que será depositau en a piscina nucleyar d’a instalación.

L’obchectivo d’a interpresa propietaria d’a central, Nuclenor, ye que l’actividat haiga rematau de raso antes de l’1 de chinero, de traza que no haiga de pagar a nueva fiscalidat recullida en a Lei de Midas Fiscals t’a Sostenibilidat Enerchetica, que se tramita en o Senau, y que gravaría o volumen de metals pesaus depositau en as plantas nucleyars que remaneixcan activas en ixa calendata.

González ha afirmau que seguntes as estimacions d’a interpresa ixa nueva fiscalidat suposaría o pago de 150 millons d’euros, una cantidat que Nuclenor considera que no sería asumible quan o zarre de Garoña ye previsto por orden ministerial t’o 6 de chulio de 2013.

O president d’o Comité d’Interpresa ha insistiu que “encara i hai tiempo ta que a interpresa de marcha ta zaga y Garoña siga funcionando”, dau que Nuclenor les ha comunicau que podría cambear de postura si se modifica en o tramite parlamentario o citau impuesto que gravaría os metals pesaus.

En iste sentiu, González ha expresau a suya confitanza en que se pueda introducir bell cambeo vía esmienda a o prochecto de Lei, que encara no ye aprebau.

O president d’o Comité tien intención de mantener una zaguera reunión con a interpresa una vegada concluiga o citau tramite en as Cortz Chenerals. A nueva normativa estableixe un impuesto por a producción de repuis nucleyars que se cifra en 2.190 euros por kilogramo d’uranio y plutonio d’o combustible nucleyar gastau.

Fuent: http://www.aragon2.com/n-20514-702-Garona_cesara_actividad_forma_definitiva_proximo_domingo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.