Gran actuación de Javier Hernández en a primer chornada de l’Open de Berlín

Javier Hernández se ye parando ta las prebas de natación adaptada d'os Paralimpicos de Londres

Istos diyas se fa en Berlín l’Open Internacional de natación adaptada en que i participa Javier Hernández. O nadador zaragozano concluyó en quinta posición, a nomás que un segundo y meyo d’o bronce, en os 150 estilos en a chornada inaugural de l’Open Internacional de Berlín. Hernández rebaixó en a final en ueito segundos la marca realizada por o maitín en as clasificatorias y aturó o crono en 3:20.06, a solo que quatro segundos d’o suyo millor rechistro. Hue compite en 50 braza y espalda.

As sensacions que buscaba Javier Hernández en Berlín las trobó ya en a suya primera competición. Os 150 estilos ha d’estar a suya preba en Londres y dimpués de l’actuación d’ahiere, as expectativas creixen y l’autoconfianza aumenta. O quinto puesto final no ye a referencia, encara que sí un goyo, ya que se computan nadadors de todas as categorías en ixa clasificación, y mas encara lo ye comprebar que ye en a buena endrezera. Os 3:20.06 realizaus en a piscina alemana le deixoron a solament quatro segundos d’o suyo millor marca personal a dos meses vista d’a suya ya mas que previsible actuación en os Chuegos de Londres.

A chornada prencipiaba con una clasificación t’a final d’a tarde y un tiempo acceptable, 3:28, que colocaba a Hernández como o sexto millor nadador y o segundo d’a suya categoría en os 150 estilos, a tres segundos d’o mexicano Reyes. Pero por a tarde, a situación amilloró enormement t’o nadador d’Aragua. Hernández rebaixó en ueito segundos o suyo tiempo, se convirtió en o millor d’a suya categoría y tocó o podio global, en quedar a solament un segundo y meyo. Istos resultaus suposan un gran goyo y una puyada d’animo ta l’aragonés con vistas a las tres prebas que encara le quedan por nadar (dos d’ellas hue) y que le han de servir, dillá d’os tiempos y clasificacions, ta pulir a tecnica y as suyas sensacions de cara a continar a suya preparación t’os Chuegos de Londres, que a suya lista definitiva la debe dar o Comité Paralimpico Espanyol a semana venient.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.