Gran afluyencia en a manifestación estudiantil

As estudiants han preso a Gran Vía, Independencia y han iu t'a Pza. d'o Pilar y t'os chudgaus. As dos personas detenidas se troban ya en libertat con cargos

Manifestación estudiantil en Gran Vía

Bells millars de personas d’esferents asociacions y sindicatos estudiantils han recorriu hue as carreras d’a capital aragonesa. Han saliu dende o campus universitaire d’a Pza. S. Francho ta plegar en o Paraninfo. Un recorriu combativo por a Gran Vía que ha obligau a chitar a persiana a bells estableiximientos que yeran ubiertos, mientres les meteban pegallos con a parola “esquirol” u “zarrau por vada cheneral”, producindo-se bells intes de tensión. O recorriu saliba dende o piquete universitaire. A presencia policial yera radida.

As consignas chiladas mientres o recorriu han estau furas, clamando a la vada cheneral, contra o gubierno, os retalles, en esfensa d’a educación publica y recriminando a qui heba decidiu de treballar u ir a clase hue. S’han ocupau tanto os carrils de coche como o bulevar central como as vías d’o tramvía, que l’han obligau a aturar o servicio por un largo tiempo.

Concentración en o Paraninfo

En o Paraninfo s’ha produciu a concentración entre totz y todas as participants que han zarrau o trafico en o Pº Pamplona. Dimpués han continau por Pº Independencia, que yera pleno de chent, ta plegar en a Pza. d’o Pilar beluns, y atros en os chudgaus a chent que quereba solidarizar-se con as dos personas detenidas de nueitz. En a carrera Alfonso i ha habiu mas enfrontinamientos verbals entre os piquetes y os comerciants que hue heban ubierto. Un interpresaire ha menazau con una porra a os piquetes, encara que a la fin no ha plegau a mas, fueras de menazas y faltadas entre as dos partis. Tamién en ista carrera, bells estableiximientos han habiu de zarrar por a presión d’os piquetes.

Concentración en os chudgaus

Unas 150 personas, tanimientres, han quiesto solidarizar-se con os sindicalistas de CGT que han estau detenius ista nueit por estricallar caixers automaticos concentrando-se en as puertas d’os chudgaus. A policía espanyola ha cusirau a dentrada, mientres se produciban atra vegada momentos de tensión entre piquetes y comercios que quasi plegan a l’enfrontinamiento fisico y que han rematau con bell chicot veire estricallau. A las 15 h., as dos personas, dimpués de declarar debant d’o chuez, han estau mesas en libertat con cargos.

Proximament mas información d’a resta d’os acontecimientos en vada cheneral en a resta d’Aragón, asinas como en l’Estau espanyol y en atros países europeus.

Una rispuesta a Gran afluyencia en a manifestación estudiantil

  1. Pingback: Gran afluyencia en a manifestación estudiantil de Zaragoza | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.