Gran participación d’os esportistas aragoneses en os Chuegos Paralimpicos

Os tres esportistas aragoneses consiguiron siet medallas y un diploma paralimpico, que se suman a l'archent d'Andrea Blas en os Chuegos Olimpicos

Teresa Perales. Fuent: Comité Paralimpico Espanyol

Gran participación aragonesa en os Chuegos Paralimpicos de Londra a on os tres participants aragoneses (Teresa Perales, Jorge Cardona y Javier Hernández) consiguiron 7 metals y un diploma paralimpico.

Teresa Perales, en natación, s’ha convertiu en a esportista aragonesa mas aclamada de totz os tiempos dimpués d’adhibir 6 medallas paralimpicas a las 16 que ya en teneba, igualando l’historial de 22 medallas olimpicas d’o nadador australiano Michael Phelps. A nadadora aragonesa consiguió as suyas 6 zagueras medallas en os Chuegos Paralimpicos de Londra (1 d’oro, 3 d’archent y 2 de bronze), 6 medallas en as 6 prebas que disputó. A medalla d’oro se le resisitió dica que en a zaguer preba (100 metros estilo libre) la ganó.

Jorge Cardona consiguió l’atro metal t’a delegación aragonesa en ganar o bronze en tenis de mesa por equipos clase 9-10 chunto a José Manuel Ruiz, dimpués de ganar 3-1 a la parella ucraniana en a luita por o bronze. Cardona ya ganó atro metal en Pekín 2008, en ixa ocasión una medalla d’archent.

Antiparti, o nadador Javier Hernández se levó un diploma paralimpico en rematar 8º en a preba de 50 metros espalda. En 150 metros estilo libre y en 50 metros braza no podió clasificar-se t’a final.

Istos resultaus se suman a la medalla d’archent d’Andrea Blas en waterpolo en os Chuegos Olimpicos, tamién en Londra.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.