Graniza manifestación en Madrit en refirme a las personas discapacitadas

Historica manifestación en esfensa d'os dreitos y d'o bienestar d'as personas discapacitadas, que son viyendo como a suya situación retacula decenios ta zaga por culpa d'a crisi

Foto: CERMI Aragón

Unas 100.000 personas se manifestoron ahiere domingo en Madrit en una convocatoria a ran estatal d’o Comité Espanyol de Representants de Personas con Discapacidat (CERMI) en a que s’ha denunciau o retalle de dreitos d’iste colectivo, un d’os que mas ye sufrindo a crisi. Uns 500 autobuses han plegau en Madrit dende esferents puestos de l’Estau.

Tanto personas con discapacidatz fisicas, psiquicas y sensorials, como familiars, voluntarios d’as asociacions en esfensa d’as personas discapacitadas como atras personas simpatizants, han marchau baixo o lema “SOS Discapacidat: Dreitos, Ilusión y Bienestar a Salvo” en una chornada historica que i ha arroclau a tot o colectivo de forma unitaria. Ista manifestación coincide con a celebración hue 3 d’aviento d’o Diya Internacional y Europeu d’a Discapacidat.

En a protesta, a la que i han acudiu unas 1.000 personas plegadas dende Aragón, s’ha criticau que no se son respectando os dreitos d’as personas discapacitadas en bell meyo d’una crisi que ye fendo retacular o bienestar d’istas personas dimpués de decenios de luita por ell y por os suyos dreitos. D’aduyas publicas se’n son retallando, asinas como bells servicios, y periglan puestos de treballo (uns 60.000) en os centros especials d’emplego destinaus a istas personas.

S’ha denunciau asinas mesmo l’incumplimiento d’as leis en o que respecta a la discapacidat y a dependencia, amás de que s’adeudan mas de 300 millons d’euros a las entidatz que treballan en iste sector sin animo de lucro dende as esferents administracions publicas, deuda que no atura de creixer debiu a os continos atrasos en os pagos d’os servicios realizaus y que deixa en una frachil situación tanto a istas entidatz como a las personas que i treballan y a las personas usuarias d’os suyos servicios. Os colectivos de discapacitaus mas afectaus son as mullers, infancia y o meyo rural.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.