Grecia apreba nuevas midas antisocials debant d’a indignación ciudadana

A policia ha desfeito una gran protesta debant d'o parlamento

O representant de Syriza en o Parlamento Europeyo, Nikolaos Chountis, ha feito publica una carta en que denuncia a violación d’os regles d’o chugo democratico ta aprebar os nueus retalles y privatizacions imposaus por a Troika a lo gubierno de cualición de Samaras.

A cualición de gubierno de Samaras, integrada por a conservadera Nueva Democracia y os socialistas d’o PASOK, prencipalment, ha presentato a lo Parlamento Heleno un nueu paquet de midas alcordau con a Troika d’o BCE, FMI, y l’UE.

Syriza sinyala que as nuevas midas d’austeridat proposadas tienen como conseqüencia directa l’agravación d’a recesión economica que pateix Grecia y dan luz verda ta malvender totz os servicios publicos y institucions d’intrés cheneral, l’augua, a tierra y demás recursos de l’Estau, xalapando a la suya vez, qualsiquier tipo de dreito social, laboral u meyoambiental.

Todas as midas alcordadas suposan más de 300 pachinas “muit tecnicas” que s’han remezclato en un articlo unico d’o que os deputaus solament han puesto disposar dende o diya anterior a la votación. En dito articlo unico constan tamién dos esmiendas que ya estioron refusadas por o propio parlamento a semana d’antis y que fan referencia a lo dreito de pensión de incheniers y periodistas.

Debant d’a votación de hué, Syriza ha proposato una moción d’inconstitucionalidat de l’articlo unico aductando a manca de constitucionalidat de qualques puntos d’o mesmo. A moción ha estada aprebada por a mayoría de deputaus presents como achusta lo procedimiento. Manimenos, o President d’a Camera, deputau de Nueva Democracia, escontento con o resultau, ha desichito un nueu recuento.

En fer-se platero que a cualición gubernamental no disposaba de miembros presents abastables como ta refusar a moción d’inconstitucionalidat, o president d’a Camera ha clamato a totz ta un receso de 30 menutos que s’ha apolargato prou más y que ha permitito a muitos deputaus d’a cualición ausents, acudir a lo Parlamento y refusar a la fín a moción de Syriza.

Entre que tot isto succedeba en o Parlamento heleno, y dende as cinco d’a tardi, decenas de milars de manifestants s’arroclaban arredol d’o mesmo en una clamada a rodiar-lo fendo publica por enesima vegada a suya oposición a las midas d’austeridat. En dita manifestación, s’han tornato a producir trafulcas entre a policía y bell uns d’os manifestants.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.