Grecia ordena o zarre de bancos y a bolsa y limitación en a retirada d’efectivo entre una semana

Ista mida responde a la fuga de capital que se ye producindo en o país mediterranio dimpués que o BCE no acceptase elevar o fundo d'emerchencia a o Banco de Grecia

Alexis Tsipras. Foto: FrangiscoDer (CC-BY-SA 3.0)

Alexis Tsipras. Foto: FrangiscoDer (CC-BY-SA 3.0)

O gubierno griego decretó o zarre d’os bancos y a bolsa dica o día 7 de chuliol, limitando a retirada d’efectivo d’os ciudadanos y ciudadanas griegas a 60 euros a o día, o que se conoixe como “corralito“.

A decisión d’o gubierno griego de Syriza-Anel viene marcada por a reunión d’o pasau sabado d’o Eurogrupo do iste organismo refusó a proposa helena de fer una prorroga d’o rescate financiero. O gubierno d’Alexis Tsipras decidió de convocar un referendum pa iste domingo pa que o pueblo griego decida si accepta a proposa de mas austeridat economica que fan dende a UE u la refusan y acceptan a proposa de Syriza.

Tsipras fació acusacions a o Banco Central Europeu de forzar-le a fer iste “corralito” dimpués d’a posibilidat que o BCE bloqueyase os fundos d’emerchencia a o Banco de Grecia, encara que finalment decidió de continar alportando liquidez a o banco griego. Manimenos Tsipras decidió d’evitar a fuga masiva de depositos dimpués que o BCE no elevase l’alportación a os fundos d’emerchencia.

O Gubierno ha demandau paciencia y calma a la población y s’han visto qualques colas en os caixers en a suya obridura.

O transporte publico será gratis en Atenas dica a fin d’ista situación y o Gubierno ha creyau una comisión que revisará cada operación de pago t’o extranchero, como medicamentos y facturas medicas que pueden estar fuera d’a limitación. Os extranchers pueden quitar diners con as suyas tarchetas d’os suyos países sin limitación.

Os y as pensionistas no son tampoco afectaus por o decreto pues en ista calendata cobran as suyas pensions y a-saber-los no disponen de tarchetas de debito u credito, por o que i hai bancos que ubrirán nomás pa iste cometiu.

Mientres, a resta de socios europeus veye con preocupación o referendum d’o venient domingo que veyen, en parolas de Juncker, president d’a Comisión Europea, como un referendum qu decidirá entre “sí u noa la Unión Europea y o euro, y declaró que a salida de Grecia d’o euronunca no ha estau ni ye una opción“.

Antiparte, as bolsas europeas han ubierto hue con grans cayidas debiu a la incertidumbre griega, encara que os mandatarios europeus han ninviau mensaches de tranquilidat y calma.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.