Gure Esku Dago. O dreito a decidir

150.000 personas participoron en l'acto por "o dreito a decidir d'o pueblo vasco"

Chuserra Barrios

Imachen de l'acto

Imachen de l’acto

O 23 d’agosto de 1989 más de millón y meyo de personas s’achuntoron a lo largo d’un estrinque de más de 600km, esnabesando os clamaus “países balticos” (Estonia, Letonia y Lituania). Bells tres quereban trucar o ficacio mundial y demandaban a “retirada d’as fuerzas d’ocupación sovieticas” d’os suyos territorios invadius en a II Guerra Mundial.

L’once de setiembre de 2013, l’estrinque humano d’a clamada “Vía Catalana” chuntó a lo largo de 400km en Catalunya os lugars de “Le Perthus” en a Catalunya Nord, con Vinaroz en o País Valencià, pa demandar a sobirania nacional catalana. Más de 1.500 autobuses, 30.000 voluntarios, 20 meyos aereos y 800 fotografos i facioron parti.

En chunio de 2013 bells representants d’a cultura y mosica vasca meteban en marcha a iniciativa “GureEskuDago”(Ye en a nuestra man) por o “dreito a decidir”, y ya en aviento presentaban en Durango o recorriu d’un “estrinque humano” de bells 123 km, dende ista ciudat vizcaina dica Iruña/Pamplona en Navarra.

Dimpués d’a replega d’os refirmes más sinyalers lugar a lugar, una organización plena de voluntariau y a compra de metro a metro por parti de cada participant, l’obchectivo y fin d’a iniciativa ye cumplida de tot.

Lo que “GureEskuDago” ha quiesto representar con o estrinque humano, d’o qual faciemos parti o zaguer 8 de chunio bellas 150.000 personas, no ye unatra d’as manifestacions por a independencia. Ye o fruito de muitas individualidatz vascas que veyen en a nueva situación chenerada en Euskal Herria una oportunidat pa ubrir o refirme a o “Dreito a decidir”.

Un mensache d’o qual, a diferencia de l’Estau espanyol, o pueblo vasco ya se’n ha chupiu dende fa tiempos, pero que agora, y limpio treballar, va conseguindo más refirmes que os ya convencius abertzales (EH-Bildu), istos zagueros con un mensache encara más claro si cabe en as zagueras eleccions europeyas. Tamién PNV se siente comodo en ista nueva iniciativa, sensibilidatz ya presents dende tiempos d’Ibarretxe, como Ezker Batua, os representants d’o PCE en a CAV (Ezker Anitza-IU), asinas como, china chana, indiviualidatz d’o PSOE que van siguindo a linia marcada por Jesús Eguiguren,…y pa rematar, l’adhesión de zaguer hora de “Podemos”.

Cal remerar que en o mundo de l’Estau espanyol, y os suyos achents politicos, nomás en aparixer as primeras manifestacions anti-monarquicas d’o 2 de chunio, se ha prencipiau a ascuitar a demanda d’un dreito humano, como ye lo “dreito a decidir”. Meyos internacionals, como los d’a televisión iraní, se trafucoron asimilando a chornada d’o domingo 8 a las protestas contra la monarquía espanyola. Y ye que no son debatz guaire lexanos,siempre plens de reflexión y conseqüencia pa la cucha, que en Euskal Herria ya leva un camín por debant.

Podemos dicir que a parola “decidir”, encara hue ye “tabú” difuera d’os territorios catalans u vascos. Nomás bell sectors minoritarios l’han chilada en as campanyas y manifiestos, alto y sin miedo. No sin risque a lamarguinación, debant d’una población no guaire parada pa istos analisis.

Cada kilometro d’o ”estrinque” ha estau chestionau por un lugar y cada metro por un vecín. L’ambientación, megafonía, transporte y distribución d’o kilometro ha estau menada por os voluntarios de cada lugar. A variedat d’euskera que se sentiba en a megafonía de cada kilometro yera muestra clara d’a procedencia d’os participants. Os mesmos que yeran entrevistaus por o rete de Radios libres “Arrosa Sarea”, qui emitiba mientres tot lo diya as incidencias y anecdotas d’a chornada. Cadagún teneba clara la suya función! Como en una gran asambleya, cada lugar, cada vico u cada asociación cultural fan parti important d’un prochecto de pueblo, que no quiere excluyir a dengún, pero que tampoco no va ha deixar que le imposen una cultura y unas politicas, que cosa han a veyer con ells.

A sensación que un “euskaldun” puede sentir tot veyendo o suyo pueblo, y o suyo lugar, movilizando-se, tiene pocas comparacions. Ye una necesidat pa ells y una preba de fuerza. Pa un “kampotarra” (forano) no guaire abezau a istas demostracions, no puede que eslucernar-se debant d’a motivación, voluntariau y rasmia d’un pueblo por conquerir a libertat, y os suyos dreitos más fundamentals.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.