Ha muerto o presunto criminal de guerra nazi mas buscau d’o mundo

Laszlo Csatáry, d'Hongría yera aguardando chuicio por crimens de guerra cometius en Hongría y Eslovaquia mientres a Segunda Guerra Mundial

Foto: http://alfahir.hu/

Foto: http://alfahir.hu/

L’hongaro Laszlo Csatáry, un d’os presuntos criminals de guerra nazi mas buscaus, morió o sabado pasau a os 98 anyos por una pneumonía en un hespital de Budapest, a on aguardaba o suyo chuicio, seguntes o que o suyo advogau Gabor Horvath ha declarau a la cadena de televisión britanica BBC.

Csatáry yera o primer d’a lista d’os nazis criminals de guerra mas buscaus. Yera sospeitoso d’haber colaborau en l’asasinato d’arredol de 15.700 chodigos en a Segunda Guerra Mundial. Yera en aspera d’estar chudgau por aquells crimens de guerra cometius en Hongría y Eslovaquia.

L’advogau Horvath ha indicau que o suyo client “recibiba un tractamiento medico pero tenió una pneumonía y ista malotía lo mató”, ha explicau.

Csatáry negó siempre istas acusacions y sinyaló que actuó solament como un simple intermediario entre as autoridatz hongaras y as alemanyas, per o que ell no se consideraba embrecau en os crimens de guerra.

En chunyo pasau, o ministerio publico hongaro l’acusó oficialment por a suya chestión como caporal d’un campo de concentración de chodigos en Košice, una ciudat que yera baixo control hongaro en a Segunda Guerra Mundial. Ixa villa ye actualment en o estau eslovaco.

Os procuradors argumentoron que Csatáry “aduyó deliberadament en as execucions ilegals y en as torturas cometidas contra os chodigos deportaus t’os campos de concentración de Košice”. Csatáry estió condenau a muerte en l’antiga Checoslovaquia en 1948 por crimens de guerra.

O gubierno d’Eslovaquia heba reclamau a suya extradición encara que, a causa de l’abolición d’a pena de muerte, lo quereban meter en prisión. En Hongría, os procesos legals se suspendioron o mes pasau por o prencipio non bis in idem, que estableixe que un sucheto no puede estar chudgau dos vegadas por a mesma causa.

Csatáry estió identificau en 2012 por o Centro Simon Wiesenthal como o criminal de guerra nazi mas buscau. Ista organización acusó a Csatáry d’haber supervisau as deportacions de chodigos de Košice t’o campo de concentración d’Auschwitz.

Periodistas d’o periodico britanico The Sun lo localizoron en chuliol de 2012 en Budapest con l’aduya d’o Centro Simon Wiesenthal y d’as autoridatz l’arrestoron en casa suya.

Csatáry heba fuyiu ta Canadá dimpués d’a Segunda Guerra Mundial. Allá treballó como marchant d’arte en Montreal y Toronto. Desapareixiu en 1997, quan as autoridatz d’Ottawa le retiroron a ciudadanía canadenca.

Fuent: http://www.jornalet.com/nova/2222/es-mort-lo-presumit-criminal-de-guerra-nazi-mai-recercat-del-mond

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.