Ha naixito en Morrano l’Asociación Penya Falconera

A finalidat d'ista nueva asociación ye meyoambiental y cultural

Penya Falconera

Penya Falconera

A basa

A basa

Gabachera

Gabachera

Ferrería

Ferrería

Torre mudexar

Torre mudexar

Ilesia y Primicia

Ilesia y Primicia

En Morrano, lugar d’a Sarra de Guara que se troba a las puertas d’o Parque Natural, varios d’os suyos vecins han creyau l’Asociación Peña Falconera, nombre trigau en honor a la formación rocosa que hue en diya ye mas conoixida como Huevo de Morrano, especialment por os aimants d’o senderismo y barranquismo. Ista Asociación naixió con as fins de recuperar, conservar, dinamizar y dar a conoixer tot o patrimonio cultural y meyoambiental d’o lugar de Morrano.

O suyo prencipal obchectivo ye a rehabilitación d’a suya ilesia parroquial adedicada a San Pedro Apóstol, de finals d’o sieglo XII pero con importants reformas en os sieglos XVII y XVIII. Un edificio una mica particular ya que aloixa 4 estilos arquitectonicos, romanico en a base, gotico, como se puede veyer en as suyos bovedas de crucería, barroco en as capiellas laterals y en zagueras mudeixar, en a parte superior d’a torre campanar, con una sencilla decoración a pur de rombos. Cal dicir que ista torre ye l’unico eixemplo d’estilo mudeixar tant a o norte d’Aragón, solament se puede trobar unatro eixemplo en a parroquial de Nueno pero ista ye obra mas temprana, d’o sieglo XVI. L’emplego d’os rombos como elemento decorativo en pleno sieglo XVII ye muit raro y interesant a la vegada. O suyo estau ye cada vegada mas amanau a la ruina, encara que cal destacar que en o zaguer decenio s’han celebrau quantos bautizos, mesmo i habió un casorio o verano pasau.

O lugar de Morrano

O lugar de Morrano

Os problemas mas importants son l’imminent espaldamiento d’o coro, l’agrietamiento y desmoronamiento d’a torre y d’as escaleras que acceden a la boveda y as goteras d’os tellaus, especialment en a capiella ta par d’o costau d’a Epistola, l’augua y a humedad son podrindo totz dos lienzos y abombando y deteriorando as paretz, fendo cayer todas as recholas. Un problema adhibiu a la ilesia ye l’edificio colindante clamau Diezmos y Primicias, que se troba completament en ruinas, propiedat de l’Obispado de Uesca y de momento ni se restaura ni se vende, mesmo quantas tellas de l’alero son a punto de cayer a la vía publica provocando un accident y as fronteras no tardarán en desmoronarse. Recordamos que fa uns anyos i habió un comprador muit intresau que hese apanyau completament ista casa y mesmo a capiella norte y o porche d’a dentrada, pero l’Obispado se negó en rotundo a vender y encara hue no i hai garra atisbo t’o suyo restauración, provocando una vista muit ruinosa y periglosa d’o lugar.

Atros obchectivos de l’Asociación serían a recuperación de tradicions propias d’a localidat como a de Santo Fabián y San Sebastián, u fomentar a restauración d’a ermita de Santo Cristóbal, l’almazara y a chicota ferrería d’o lugar, ista zaguera tamién prencipia a estar un periglo t’os caminants porque una d’as suyas paretz de piedra ye a punto d’espaldarse, o parque se troba a o costau, por la qual cosa o periglo se treslada ent’os ninos. a limpieza y acondicionamiento d’o camín d’a ermita de Santo Bartolomé y d’a fuent de Gabachera son atras de las fiques de l’Asociación, a fuent de Gabachera yera l’antigo lavador d’o lugar, construiu por musulmans, un puesto fresco y sombrío, ideyal ta pasar os calurosos días d’o verano.

A proxima creyación d’o museo sobre aus d’o naturalista David Gómez en l’antiga escuela, hue centro social, aduyará muito a que Morrano se conoixca mas en a resta d’o país y pueda aduyar a detener l’espoblamiento que sufre o lugar, ya que dende prencipios d’o sieglo pasau an se plegoron a aconseguir 200 personas y 40 casas, i hai habiu una incesant y continada perda de población, dica plegar a l’actualidat a poco mas d’una dotzena d’habitants, con pro risgo en un futuro no guaire leixano l’espoblamiento quasi total d’ista localidat.

Morrano poseye un interesant y rico patrimonio natural, como a Penya Falconera u Huevo de Morrano, o barranco d’a Peonera inferior, o blinco de Trensús, o Solencio de Morrano, as fuents d’o Puntillo y a Tamara, a fuent d’as Mazanas, Peña Ruaba, o Espaladar, o Tozaler Pelau y o pinar de Morrano, que conta con eixemplars de pino silvestre que son os mas meridionals de tot o Parque Natural y de l’Alto Aragón. As ermitas de Santo Bartolomé, muit proxima a o lugar y a de Santo Martín de Morrano, tamién conoixida como Santo Martín de l’Alcanadre, situada debaixo d’un macizo rocoso en o barranco d’a Peonera, se suman a o rico patrimonio con el qual conta a bella localidat de Morrano y que l’Asociación cultural y meyoambiental Peña Falconera tractará de promocionar y dinamizar por meyo de diversas actividatz culturals ta que sía conoixiu, desfrutau y cudiau por totz.

Una rispuesta a Ha naixito en Morrano l’Asociación Penya Falconera

  1. Pingback: Ha naixito en Morrano l’Asociación Penya Falconera | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.