Helios caye ta puestos de baixada

O CAI Santiago s'embolica la vida.

Enrique Ruiz estió lo chugador más destacau d'o CAI Santiago en División d'Honor. (Foto: Comunicación Tenis de Mesa)

O CAI Santiago y o CN Helios han culliu iste cabo de semana resultaus muit negativos ta l’obchectivo d’aconseguir a permanencia en a División d’Honor de tenis de mesa. O conchunto heliofilo perdió os suyos dos partius en tierras gallegas debant d’o Club d’o Mar (4-2) y o Liceo Vilagarcía (4-3), o qual le fa cayer a puestos de baixada, a causa d’a victoria d’o Artimos Borges sobre o CAI Santiago.

Con istes resultaus, Helios enampla a suya mala racha y se troba ya en zona de baixada, empatau a cinco triumfos con o Artimos Borges, que le tiene ganau o averache particular.

Y ye que l’equipo ilerdense superó por 2-4 a l’unatro equipo aragonés, o CAI Santiago, que tiene seis victorias y que perdió asinas una buena oportunidat de dar un important paso ent’a salvación.

O chovenil Enrique Ruiz, que substituiba a o lesionau Jorge Gambra y fuo o millor chugador caísta, redotó a Oriol Mir (3-0), qui dimpués tamién cayó contra Alberto Luño (3-1), pero os visitants se levoron o triumfo gracias a las achustadísimas victorias d’o suyo base José Luis Andrade sobre Jorge Cardona y de David González debant de Ruiz, todas dos por 2-3.

En Primera División femenina, o CN Helios venció por un claro 0-6 Cassanenc y perdió por 4-3 en a pista d’o Suris Calella, an Ainhona Antúnez fació doblete y Laura Ciriano aportó unatro tanto, pero as aragonesas cayoron por 3-2 en un dobles con polemica arbitral en o cinqueno set.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.