Helios vence a o CAI en l’emocionant derbi aragonés

Con iste resultau, Helios creba la suya racha negativa y abandona la zona de baixada.

Alfonso Beamonte estió clau en a victoria d'Helios en o derbi aragonés. (Foto: Comunicación Tenis de Mesa)

O CN Helios s’imposó por un achustau 4-3 a o CAI Santiago en o derbi aragonés d’a División d’Honor de tenis de mesa, que se prolongó mientras tres horas y se resolvió en o dobles decisivo a favor d’a parella azulona formada por Marcelo Toledo y Alfonso Beamonte, qui s’imposoron por un solvent 3-0 a os caístas Jorge Cardona y Alberto Luño.

Antes d’ixo, Beamonte y Toledo heban ganau por 3-0 a o chuvenil d’o CAI Enrique Ruiz, y Cardona y Luño heban feito lo propio con o tercer chugador d’Helios, Víctor Dobato (3-0 y 3-1, respectivament). Muito mas igualaus estioron os atros dos individuals entre totz dos millors palistas de cada equipo. Primero Beamonte ganó 3-2 a Luño en un largo choque en o qual salvó seis bolas de partiu en o quarteno set, aconseguindo un punto que sería clau t’a victoria final d’Helios. Dimpués Cardona superó a o chileno Marcelo Toledo por unatro emocionant 2-3.

Como ya ocurrió en a trobada d’a primera tornada, que se saldó con o mesmo resultau, o derbi estió cargau d’emoción y tensión, dica o punto que l’arbitro José Ignacio Pina sufrió un mareo y habió d’estar substituiu entre qualques menutos dica que se recuperó.

Con iste resultau, Helios creba la suya racha negativa y abandona la zona de baixada en detrimento d’o CTT Borges. Por a suya parte, o CAI Santiago se sitúa con os mesmos puntos que l’equipo heliofilo, encara que con dos partius menos disputaus, y habrá de seguir luitando ta certificar a remanencia en a categoría de plata, que se atura agora dos semanas por a celebración d’os Campionatos d’Espanya.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.