Helios y CAI Santiago continan ganando en tenis de mesa

Os dos equipos podrían luitar por puyar de división

Tres d'os tenistas (Foto: Federación Aragonesa de Tenis de Mesa)

Tres d’os tenistas (Foto: Federación Aragonesa de Tenis de Mesa)

O CAI Santiago y o CN Helios continan con a suya racha positiva en a División d’Honor masculina de tenis de mesa, dimpués de ganar a l’Arteal de Santiago de Compostela. O conchunto gallego, que visitaba iste cabo de semana as pistas d’os dos equipos aragoneses reforzau fichando a o serbio Denis Conic, estió redotau por un achustau 4-3 debant d’o equipo d’Helios y por un 5-1 contra os caístas.

Alfonso Beamonte y Marcelo Toledo (en a foto) tornoron a liderar a Helios, contrimostrado que son en un gran estau de forma. Os dos chugadors nomás han peridu un dobles en as dos zaguers temporadas en División d’Honor, y tampoco no rebló ista vegada debant d’a parella de l’Arteal, formada por Conic y Eduardo Barreiro (3-0).

Antis d’o dobles decisivo, Toledo heba ganau os suyos dos indivicuals contra Barreiro (3-1) y Francisco Torres (3-0) y Beamonte superó tamién a Torres encara que cayó debant de Conic por 2-3, entre que o tercer chugador d’Helios, Victor Dobato, perdió os suyos dos puntos.

D’atra man, o CAI Santiago, ganó a l’Arteal en una buena partida d’os suyos tres palistas cutianos. Destacoron de traza especial Alberto Luño y Enrique Ruiz, que ganoron totz os suyos individuals. Jorge Cardona sumó un atro punto, encara que perdió contra Conic.

Dimpués d’istos resultaus, Helios y CAI encetan a segunda tongada d’a competición con ueito victorias y quatre redotas, o mesmo balanz que l’equipo de Madrit “Las Rozas”. Con istos buenizos numers, os dos equipos aragoneses son ya luen d’os puestos de baixada. Encara que os dos equipos prencipioron con l’obchetivo de salvar a categoría, o CAI ya ye tercer de grupo, lo que da dreito a chugar a fase ta puyar t’a elite de Super División, y Helios ye cinqueno con os mesmo puntos.

En Primer División femenina, o CAI Santiago perdió por 4-2 en a suya visita t’o TM Puertollano, en una trobada con parcials achustaus. Os puntos d’as d’o CAI estioron obra de Yara Grimal y María Vallespí, entre que Cristina Raducán no podió fer puntos. D’ista traza, o CAI contina en a debantzaguera posición d’a clasificación.

En Segunda, o CAI Santiago (Cristian López, Raúl Maicas y Eduardo Ruiz) ganó a o  UE Sant Cugat por 6-0, aprofeitando bellas baixas importants entre os catalas. Con ista victoria o CAI puya ta quarta posición con cinco trunfos de diez posibles.

Os dos equipos d’o School Zaragoza,o de División d’Honor femenina y o de Segunda División masculina, tenioron chornada de descanso.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.